Vətəndaş Rəqsanə Rəhmanova Zamex kargo şirkətindən narazılıq edib.
AzPost xəbər verir ki, onun sözlərinə görə, sifariş verdiyi bağlamalar artıq üç həftədən çoxdur ki, xarici anbarda saxlanılır və çatdırılma həyata keçirilmir.
Şikayətçi bildirir ki, məsələ ilə bağlı şirkətin “call center”inə dəfələrlə müraciət etsə də, zənglərinə cavab verilmir. “Telefonu açan olmur. Növbədə birinci sırada göstərildiyim halda yarım saat, hətta bir saata yaxın gözlədilirəm, sonda isə heç kəs cavab vermir”, – deyə o qeyd edib.
Mütəxəssislərin fikrincə, bu kimi hallarda istehlakçılar xidmət müqaviləsinə uyğun olaraq vaxtında və keyfiyyətli xidmət tələb etmək hüququna malikdirlər. “İstehlakçıların hüquqlarının müdafiəsi haqqında” Qanuna əsasən, vətəndaş aldığı xidmət göstərilmədikdə, ya da gecikdirildikdə, rəsmi şikayət təqdim edə və zəruri hallarda müvafiq dövlət qurumlarına müraciət edə bilər.
Hüquqşünaslar vətəndaşlara məsləhət görürlər ki, əvvəlcə şirkətə yazılı formada rəsmi müraciət ünvanlasınlar. Cavab verilmədikdə isə Antiinhisar və İstehlak Bazarına Nəzarət Dövlət Xidmətinə və ya məhkəməyə şikayət etmək mümkündür.
Məsələ ilə bağlı Zamex kargo şirkətindən açıqlama verilməyib.
