Meksika Senatında ABŞ-ın ölkəyə hərbi müdaxiləsi məsələsi ətrafında aparılan müzakirələr gərgin dava ilə nəticələnib.
AzPost xəbər verir ki, CNN-in məlumatına görə, sessiya zamanı müxalifət partiyasının lideri, senator Alehandro Moreno ilə Senatın sədri, iqtidar partiyasından Herardo Fernandes Noroña arasında insident yaşanıb. Moreno çıxışına imkan verilmədiyini iddia edərək tribunaya qalxıb və Noroñanın əlindən tutaraq onu ittiham edib. Bu andan etibarən tərəflər arasında fiziki toqquşma başlayıb.
Qısa zamanda digər senatorlar da mübahisəyə qarışıb, canlı yayımda nümayiş olunan kadrlar isə sosial şəbəkələrdə geniş müzakirələrə səbəb olub. Kadrda Morenonun bir şəxsi yerə yıxdığı, başqa birinin isə Noroñaya zərbə endirməyə cəhd etdiyi görünür.
Noroña hadisədən sonra açıqlamasında hücuma məruz qaldığını bildirib və Morenonu ölüm təhdidində günahlandırıb. Öz növbəsində Moreno isə qarşı tərəfin ilk olaraq onu təxribata çəkdiyini iddia edib.
Məsələni qızışdıran əsas səbəblərdən biri ABŞ-ın Meksikadakı narkokartellərə qarşı mümkün hərbi əməliyyatı ilə bağlı müzakirələr olub. Xüsusən də son vaxtlar ABŞ-dan gələn bəyanatlar və sabiq prezident Donald Trampın bu məsələdə hərbi güc tətbiqinə yaşıl işıq yandırması ölkədə siyasi ziddiyyətləri daha da alovlandırıb.
Qeyd edək ki, Meksika parlamentində fiziki qarşıdurmalar nadir hallarda baş verir, lakin 2006-cı ildə də prezident seçkilərinin nəticələri ilə bağlı oxşar insident yaşanmışdı.
