Azərbaycanda dana əti bahalaşır. Məlumatlara görə, son günlər istər Bakıda, istərsə də ölkənin bir çox rayonlarının satış məntəqələrində dana ətinin kiloqramı 17 manata yüksəlib.
Ötən ay dana ətinin kiloqramının qiyməti 14 manatdan 16 manata qədər artmışdı.
Məlumata görə, dana ətinin topdansatış məntəqələrində qiyməti artıb. Ayrı-ayrı müstəqil iqtisadçıların fikrincə isə, ölkədə qırmızı ət bahalaşmaqda davam edəcək. Onların sözlərinə görə, hazırda örüş yerləri az, yem məhsulları isə bahadır.
Azərbaycanda ət idxal olunan ərzaq məhsullarında əsas yerlərdən birini tutur. Dövlət Gömrük Komitəsinin (DGK) məlumatına görə, 7 ayda ölkəyə 55.1 milyon dollar həcmində 25 min 180 ton ət idxal edilib.
Bu ilin ilk 7 ayının nəticələrinə görə, Azərbaycanın idxal etdiyi ətin kiloqramının orta idxal qiyməti 3 manat 72 qəpik təşkil edib. Bəzi müstəqil ekspertlər ölkəyə idxal edilən ətin keyfiyyətinə də şübhə ilə yanaşırlar.
