Şri-Lankada buddist monaxlarını daşıyan kanat yolu vaqonu qəzaya uğrayıb. AzPost xəbər verir ki, Daily Mirror-un məlumatına görə, hadisə nəticəsində 7 nəfər həyatını itirib, daha 6 nəfər isə müxtəlif dərəcəli xəsarətlər alıb.
Məlumata əsasən, qəza ötən gün axşam saat 21:00 radələrində baş verib. Həmin vaxt 13 monax müqəddəs yerdə dini ayinləri icra etdikdən sonra monastıra qayıdırdı. Vaqonu daşıyan trosun qırılması səbəbindən kabin uçuruma yuvarlanıb.
Şahidlərin sözlərinə görə, monaxlardan ikisi hündürlükdən yıxılmadan öncə vaqondan tullanaraq möcüzəvi şəkildə sağ qalıb və yalnız yüngül xəsarət alıb. Hadisə yerinə dərhal xilasedicilər və polis əməkdaşları cəlb olunub.
Rəsmilər bildiriblər ki, ölənlərin arasında yalnız yerli sakinlər deyil, həm də əcnəbilər var. Onların Rusiya, Rumıniya və Hindistandan olduğu təsdiqlənib.
İlkin versiyaya görə, faciə trosun texniki nasazlığı ilə bağlı olub. Hadisənin dəqiq səbəbləri müəyyənləşdirilmək üçün istintaq aparılır.
