Leobankın təqdim etdiyi “Uşaq kartı” xidməti ilə bağlı vətəndaş narazılıqla üzləşib.
AzPost xəbər verir ki, vətəndaş Aqil Tağıyev məktəbli övladı üçün kart sifariş etdiyini, lakin bankın şərtlərinin buna imkan vermədiyini bildirib. Onun sözlərinə görə, kuryer kartı təqdim edərkən 15 yaşdan yuxarı olan uşağın şəxsən iştirak etməli və müqaviləni imzalamalı olduğunu qeyd edib.
Valideyn məsələ ilə bağlı bankla əlaqə saxlayıb və bu şərtin səbəbini soruşub. Cavab olaraq bildirilib ki, 15 yaşdan yuxarı şəxslər Mülki Məcəlləyə əsasən müəyyən dərəcədə mülki-hüquqi əməliyyatlar həyata keçirmək qabiliyyətinə malikdirlər. Xüsusən, Mülki Məcəllənin 29-cu maddəsinə görə, 14–18 yaş arası şəxslər müəyyən əməliyyatları valideynlərinin razılığı ilə müstəqil icra edə bilirlər. Bu səbəbdən də bank həmin yaş qrupunu mütləq müqavilə tərəfi kimi görür və imzasını tələb edir.
Aqil Tağıyev isə qərarla razılaşmadığını bildirərək deyib: “Məktəb dərsliklərini güclə mənimsəyən 15 yaşlı şagirdin bank müqaviləsinin məzmununu tam başa düşəcəyini iddia etmək absurd görünür. Kartı sifariş edən, vəsait yükləyən və məsuliyyət daşıyan valideynin iştirakı kifayət olmalı idi”.
Valideyn nəticədə kartdan imtina etdiyini açıqlayıb.
Qeyd edək ki, mövcud qanunvericilikdə 14 yaşdan yuxarı şəxslər müəyyən məhdud çərçivədə hüquqi müqavilələr bağlaya bilsə də, bu, valideyn razılığı ilə mümkündür. Lakin banklar risklərin qarşısını almaq üçün həmin yaşda olan müştərilərin də imzasını tələb etməklə özlərini hüquqi baxımdan sığortalayırlar.
Məsələ ilə bağlı Leobankın mövqeyini dərc etməyə hazırıq.
