Manikürdə geniş istifadə olunan gellakların insan sağlamlığına zərər verdiyi barədə iddialar mütəxəssislər tərəfindən təkzib edilib.
AzPost xəbər verir ki, bu barədə RTU MIREA universitetinin qeyri-üzvi kimya kafedrasının dosenti, kimya elmləri namizədi Andrey Doroxov “Life.ru”ya açıqlama verib.
Alim bildirib ki, gellaklarla bağlı əsas narahatlıqlar onların tərkibindəki (2,4,6-Trimetilbenzoyl) difenilfosfin oksid (TPO) maddəsi ilə bağlıdır. Bu komponent fotopolimerləşmə prosesində istifadə olunur. Doğrudur, yüksək dozada TPO reproduktiv funksiyalara mənfi təsir göstərə bilər. Lakin Doroxovun sözlərinə görə, gellakların tərkibində bu maddənin miqdarı çox azdır və o, dırnaq lövhəsi vasitəsilə demək olar ki, sorulmur.
Mütəxəssis əlavə edib ki, TPO uçucu maddə deyil, buna görə də gellakın qoxusundan qorxmağa əsas yoxdur. Onun sözlərinə görə, maddənin konsentrasiyası o qədər aşağıdır ki, real sağlamlıq riski yaratmır.
Doroxovun qənaətinə görə, gellakların zərərli olması ilə bağlı yayılan xəbərlər elmi əsaslara söykənmir və daha çox ictimaiyyət arasında əsassız narahatlıq yaradır.
