“İnvest-Az” İnvestisiya Şirkəti” Qapalı Səhmdar Cəmiyyətinin (QSC) adı yenidən dələduzluq cinayəti ilə gündəmə gəlib.
AzPost xəbər verir ki, R.Şamilli adlı şəxs sözügedən şirkət vasitəsi ilə “Forex” valyuta bazarına yatırım etmək adı ilə sinif yoldaşının 106 500 manat pulunu dələduzluq yolu ilə ələ keçirib. Zərəçəkmiş şəxsin şikayəti əsasında R.Şamilli saxlanılıb və daha sonra ona Cinayət Məcəlləsinin 178.3.2-ci maddəsi ilə ittiham elan olunub. Həmçinin onun barəsində başqa yerə getməmək haqqında iltizam qətimkan tədbiri seçilib.
Cinayət işinə Bakı Ağır Cinayətlər Məhkəməsində baxılıb.
Məhkəmə prosesi zamanı R.Şamilli bildirib ki, sinif yoldaşı özü “İnvest.AZ” İnvestisiya Şirkəti” QSC vasitəsilə “Forex” valyuta bazarına pul qoymağı və qazancı bölüşməyi təklif edib. Onun sözlərinə görə, sonradan yatırım etdikləri bəzi şirkətlər fəaliyyətini dayandırıb. Bu baxımdan, o, sinif yoldaşından aldığı pulları qaytara bilməyib. Zərəçəkən isə bildirib ki, R.Şamilli əvvəllər ona qazanc olaraq müəyyən məbləğlər versə də, sonradan bunu dayandırıb. O əlavə edib ki, sonuncu dəfə təqsirləndirilən şəxsə 20 000 manat verib. Zərərçəkən məhkəmənin diqqətinə çatdırıb ki, ona dəymiş ziyanın ödənilməsini tələb edir.
Məhkəmənin hökmü ilə R.Şamilliyə 6 il 6 ay müddətinə azadlıqdan məhrum etmə cəzası təyin edilib. Onun saxlanıldığı 2 gün müddət təyin edilmiş cəzadan çıxılıb və üzərində qəti olaraq 6 il 5 ay 28 gün müddətinə azadlıqdan məhrum etmə cəzası saxlanılıb.
Bundan əvvəl isə R.Dadaşov adlı şəxs “İnvest.Az İnvestisiya Şirkəti” QDC-nin adı ilə dələduzluq etdiyinə görə məhkum edilib.
