G7 ölkələri 2025-ci ildə Ukraynaya iyirmi beş milyard beş yüz milyon dollar həcmində maliyyə dəstəyi göstərib.
AzPost xəbər verir ki, bu vəsait dondurulmuş Rusiya aktivlərindən əldə olunan gəlirlər hesabına formalaşdırılıb.
Xatırladaq ki, ötən il “Böyük yeddilik” ölkələri Kiyevə təqribən əlli milyard dollarlıq kredit ayrılması barədə razılığa gəlmişdi. Sözügedən vəsaitin mənbəyi məhz Rusiya Federasiyasının müsadirə olunmuş aktivlərindən əldə edilən gəlirlərdir.
Maliyyə Nazirliyi və Avropa Komissiyasının məlumatına görə, bu ilin birinci oktyabr tarixinədək ümumilikdə iyirmi altı milyard beş yüz milyon dollar Ukraynaya köçürülüb. İlk tranş ötən ilin sonunda ABŞ tərəfindən bir milyard dollar məbləğində təmin olunmuşdu.
Cari ildə əsas maliyyə dəstəyi Avropa İttifaqı tərəfindən göstərilib – Brüssel Ukraynaya on beş milyard səkkiz yüz milyon dollar ayırıb. Kanada üç milyard dörd yüz milyon, Yaponiya üç milyard üç yüz milyon, Böyük Britaniya isə üç milyard dollar maliyyə vəsaiti təqdim edib.
