İran Hörmüz boğazının fəaliyyətini iki gün ərzində bərpa etmək imkanını nəzərdən keçirir. Lakin bunun üçün ABŞ Tehran tərəfindən irəli sürülən bir sıra tələbləri yerinə yetirməlidir.
Bunu İran Xarici İşlər Nazirliyinin rəsmi nümayəndəsi İsmayıl Bəqayi bəyan edib.
Bu barədə “The Times of Israel” nəşri yazır.
Onun sözlərinə görə, İran tərəfi müvafiq planın 48 saat ərzində həyata keçirilməsini mümkün hesab edir. Tehran bunu ölkənin mövcud vəziyyəti nizamlamağa hazır olduğunun göstəricisi kimi qiymətləndirir.
Bəqayi vurğulayıb ki, İranın tələblərinin yerinə yetirilməsi Hörmüz boğazında gəmiçiliyin təhlükəsizliyini bərpa etməyə və qısa müddətdə danışıqlar prosesinə qayıtmağa imkan verəcək.
XİN nümayəndəsi həmçinin bildirib ki, vasitəçilər üzərindən əlaqələr davam edir və tərəflər bir-birinə mesajlar ötürür.
Bundan əvvəl İran strateji dəniz marşrutunun açılması məsələsinin bir həftə ərzində həllini təklif etmişdi. Tehran sentyabr ayından etibarən müvafiq planı irəli sürür. Lakin ABŞ Prezidenti Donald Tramp hələlik bu təklifin şərtləri ilə razılaşmayıb.
İranın təklifi, xüsusilə, ABŞ-ın İran limanlarına tətbiq etdiyi blokadanın aradan qaldırılmasını, İranın dondurulmuş aktivlərinin sərbəst buraxılmasını, eləcə də Hörmüz boğazından keçən və Tehranın dəstəklədiyi gəmiçilik marşrutunun razılaşdırılmasını nəzərdə tutur.
Bu şərtlər yerinə yetirildikdən sonra İran boğazın fəaliyyətini bərpa etməyə hazır olduğunu bildirir.
Hörmüz boğazı beynəlxalq ticarət və enerji resurslarının daşınması baxımından strateji əhəmiyyət daşıyır. Onun bağlanması və gəmiçiliyə məhdudiyyətlərin tətbiqi regionda dəniz daşımaları üçün əlavə risklər yaradır.
Nadir
