“Ailələrə Sosial Dəstək” İctimai Birliyinin təşkilatçılığı ilə “Cəmiyyətin sağlam gələcəyi uğrunda maarifləndirmə işlərinin təşkili” layihəsi öz fəaliyyətini davam etdirir.
Birliyin sədri və layihə rəhbəri Esmira Rəhimova bildirib ki, layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilir:
“Layihənin icrası Quba rayonunda, şəhid İbrahim Şahmərdanov adına Qəcrəş tam orta məktəbində təşkil olunur.
Bu layihənin keçirilməsində məqsəd yetkinlik yaşına çatmayanların erkən evliliyi və qohum nikahlarla bağlı mövcud problemlərin qarşısının alınmasına dəstək olmaqdır. Ailə dəyərləri xalqımız üçün müqəddəsdir. Azərbaycan cəmiyyətinin sağlam inkişafı üçün ailə institutunun gücləndirilməsi, erkən evliliyin, qohum nikahlarının və boşanma hallarının azalması istiqamətində görülən tədbirlərə dəstək vermək, eləcə də sözügedən problemlərin aradan qaldırılması məqsədilə təhsilin və hüquqi maarifləndirmənin artırılması, xüsusilə regionlarda bu istiqamətdə fəaliyyətin gücləndirilməsi mühüm əhəmiyyət daşıyır.
Layihənin həyata keçirilməsi nəticəsində yeniyetmələr arasında erkən və qeyri-rəsmi nikahların mənfi nəticələri və fəsadları, eləcə də qan qohumları arasında bağlanan nikahlar nəticəsində doğulan uşaqlarda genetik xəstəliklərin yaranma riskləri barədə maarifləndirmə işi aparılır. Bununla yanaşı, layihə çərçivəsində yeniyetmələrin hüquq və azadlıqlarının müdafiəsi, bu istiqamətdə yeni qəbul edilmiş qanunvericilik kontekstində mövcud məsələlər ətrafında maarifləndirmə tədbirləri həyata keçirilməkdədir.
Erkən və qeyri-rəsmi nikahların fəsadları, qan qohumları arasında bağlanan nikahların doğurduğu genetik risklər barədə yeniyetmələr məlumatlandırılır. Xüsusilə qızların təhsil almaq hüququ, ailə hüquqları və nikah müqaviləsindən irəli gələn öhdəliklərin yerinə yetirilməsi barədə təbliğat işi aparılıb. Bu yolla cəmiyyətin gələcək sağlam inkişafına töhfə verməyə çalışmışıq.
İnanıram ki, bu layihənin icrası ailə üzvləri arasında qarşılıqlı hörmətin, hüquq və öhdəliklərə məsuliyyətli yanaşma vərdişlərinin formalaşmasına, həmçinin yeniyetmələr arasında hüquqi maarifləndirmənin təbliği və onların öz hüquqlarını müdafiə bacarıqlarının təkmilləşdirilməsinə xidmət edəcək.”
