Məşhur britaniyalı musiqiçi, “Moody Blues” qrupunun solisti və basçısı Con Lodc 82 yaşında dünyasını dəyişib. AzPost xəbər verir ki, bu barədə məlumatı Metro nəşri musiqiçinin ailəsinə istinadən yayıb.
Ailənin bildirdiyinə görə, ölüm qəfil və gözlənilməz şəkildə baş verib. Onlar ölüm səbəbini açıqlamamağı qərara alıblar.
“Dərin kədər içində bildiririk ki, əziz ərimiz, atamız, babamız və qardaşımız Con Lodc qəfil və gözlənilmədən bizdən alındı”, – deyə ailənin bəyanatında qeyd olunur.
Con Lodc “Moody Blues” qrupuna onun yaranmasından iki il sonra, 1966-cı ildə qoşulmuşdu. O, həm ifaçı, həm də bəstəkar kimi kollektivin uğurunda mühüm rol oynamış, “Nights in White Satin”, “I’m Just a Singer (In a Rock and Roll Band)” kimi məşhur mahnıların yaranmasında iştirak etmişdi.
Qrupun musiqisi 1960–1980-ci illərin rok səhnəsində xüsusi iz buraxıb. “Moody Blues” simfonik rok janrının inkişafında önəmli rol oynamış və 2018-ci ildə Rok-n-Roll Şöhrət Zalına daxil edilmişdi.
Musiqi ictimaiyyəti Lodcu “zəngin vokalı, səmimi səhnə enerjisi və klassik rok ruhunun simvolu” kimi xatırlayır. Onun yaradıcılığı həm “Beatles dövrü”nün, həm də müasir rok estetikasının körpüsü sayılır.
