“Təzə Pir” məscidinin ətrafı – paytaxtın “Bayırşəhər” adlanan hissəsində söküntülərin məhkəmədə yekun qərar çıxarılanadək dayandırılması barədə sakinlərin müraciəti rədd edilib.
Bu haqda Azadlıq Radiosuna söküntüyə etiraz edən sakinlərdən Zahidə Əzizova məlumat verib.
“Bayırşəhər”in sökülməsinə etiraz edən sakinlərdən bir qrupu aylar öncə Bakı şəhər İcra Hakimiyyətini məhkəməyə verib. 31 nəfərin Bakı İnzibati Məhkəməsinə təqdim etdiyi iddia ərizəsində bu qurumun söküntü barədə sərəncamının ləğvi tələb olunur.
Sərəncama əsasən, Azərbaycan prospekti ilə Mirzə Fətəli Axundov, Nizami və Mirzağa Əliyev küçələri arasında qalan ərazi sökülməlidir. Təxminən dörd aydır ki, sərəncamın icrası başlayıb. Ərazidə xeyli ev sökülüb.
Bu üzdən iddiaçılar məhkəməyə ərizə vermişdilər ki, onların iddiasına baxılıb yekun qərar çıxarılanadək söküntü dayandırılsın. İcra hakimiyyətinə ərazidə söküntü işlərinin aparılması qadağan edilsin.
Bakı İnzibati Məhkəməsinin hakimi Səlma Qənbərovaonların bu ərizəsini mümkün saymayıb. Onlar müvəqqəti təminat tədbiri ilə bağlı ərizələrinin təmin olunmaması haqda qərardaddan apellyasiya şikayəti veriblər. Lakin Bakı Apellyasiya Məhkəməsinə şikayətləri də nəticəsiz qalıb.
31 narazı sakinin Bakı şəhər İcra Hakimiyyətinə qarşı “Bayırşəhər”in sökülməsi barədə sərəncamın ləğvindən ötrü şikayəti üzrə məhkəmə iclası isə noyabrın 7-nə təyin olunub.
Z.Əzizova vurğulayır ki, “Bayırşəhər”i sökmək Bakının tarixini, mədəniyyətini məhv etməkdir. Onun sözlərinə görə, ərazidə yerli və ölkə əhəmiyyətli 113 tarixi abidə yerləşir: “Burada elə binalar var, onları sökmək ölkəmizin keçmişindən gələcəyinə qoyulan mirası məhv etməkdir. Hər məhəllədən bir neçə evi olmaqla, təxminən 10 faizi artıq söküblər. Ərazini yerlə-yeksan ediblər. Amma Yasamal rayonunun icra başçısının müavini bizə cavab məktubunda yazır ki, “ərazidə abadlaşdırma işləri aparılır, binaların zahiri görkəmi yaxşılaşdırılır”. Tarixi abidələri məhv etmək abadlaşdırmaqdır?”.
Ərazidə yaşayan sakinlərin bildirdiyinə görə, ev sahiblərinə hər kvadratmetr üçün 2 min 700 manat, obyektlərə görə isə 3 min manatdan pul təklif olunur.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən bildirilib ki, söküntü ərazisindəki tarixi abidələr qorunacaq.
“Təzə Pir” ətrafında sökülən tikililərin yerində isə park salınacaq. O da Mərkəzi Parka birləşdiriləcək.
