ABŞ-da qeyri-adi oğru spirtli içki satılan mağazaya girib.
AzPost bildirir ki, mağazada içki içən sərxoş yenot vitrinləri dağıdıb.
Şimali Amerikadakı yenotlar tez-tez yemək axtararaq evlərə girirlər. Amma bu zolaqlı müştəri içki mağazasında heç bir yemək tapmayıb və ətrafı dağtmağa başlayıb.
Səhər mağaza işçisi gələndə hər yerə səpələnmiş qırıq şüşələri, günahkarın isə tualet döşəməsində huşsuz və sərxoş vəziyyətdə yatdığını aşkar edib.
“Şəxsən mən yenotları sevirəm”, – deyə yerli heyvanlara nəzarət üzrə məmur Samanta Martin Associated Press-ə bildirib. “Əhvalat həm də gülməlidir. Görünür, bu yenot damda gəzib və tavan plitələrindən birinin deşilməsinə səbəb olub. Sonra isə əsl qarışıqlıq yaradıb”.
Yenotu mağazadan heyvan sığınacağına aparan Samanta olub. O, ora gedərkən gülməkdən özünü saxlaya bilməyib. Heyvan Xidmətləri və Aşland yaxınlığındakı Hanover Şəhər Sığınacağı daha sonra yenotun ayıldığını və səhhətinin yaxşı olduğunu təsdiqləyib.
Agentlik qeyd edib ki, bir neçə saat yatdıqdan sonra yenot təhlükəsiz şəkildə vəhşi təbiətə buraxılıb.
