Çin–ABŞ münasibətlərində gərginlik yeni mərhələyə keçib.
AzPost xəbər verir ki, Çin hakimiyyəti ABŞ-ın hərbi-sənaye kompleksi ilə əlaqəli 20 müdafiə şirkətinə qarşı sanksiyalar tətbiq edib.
Rəsmi Pekinin açıqlamasında bildirilir ki, qərar ÇXR-in “xarici sanksiyalara qarşı mübarizə haqqında” qanununa uyğun olaraq qəbul edilib. Sanksiyalar həm şirkətləri, həm də onların rəhbər şəxslərini əhatə edir. Çin tərəfi bu addımı ABŞ-ın son dövrlərdə həyata keçirdiyi siyasətə cavab tədbiri kimi qiymətləndirir.
Qərara əsasən, siyahıya salınmış şirkətlərin Çindəki bütün daşınar və daşınmaz əmlakı, eləcə də digər maliyyə aktivləri tam şəkildə dondurulur. Bu, həmin şirkətlərin Çin bazarında fəaliyyət imkanlarını ciddi şəkildə məhdudlaşdıracaq.
Xatırladaq ki, bundan əvvəl Pentaqon ABŞ-ın Tayvana satılmasına razılıq verdiyi silahların ümumi dəyərinin 11 milyard dolları keçdiyini açıqlamışdı. Pekin isə Tayvanı Çinin ayrılmaz hissəsi hesab edir və bu istiqamətdə atılan hər hansı hərbi addımı ölkənin suverenliyinə birbaşa təhdid kimi qiymətləndirir.
Çin rəsmiləri dəfələrlə bəyan ediblər ki, ABŞ-ın Tayvanla hərbi əməkdaşlığı regionda sabitliyi pozur və gərginliyi artırır. Yeni sanksiyaların da məhz bu siyasətə cavab olaraq tətbiq edildiyi vurğulanır.
