Venesuelada baş verən son siyasi hadisələr qlobal enerji bazarlarında dərhal əks-səda doğurub. AzPost xəbər verir ki, investorların riskləri yenidən qiymətləndirməsi fonunda neft qiymətlərində eniş müşahidə olunur.
Məlumata görə, bazar ertəsi günü neftin dünya bazar qiymətləri aşağı istiqamətdə hərəkət edib. Buna səbəb kimi Venesuelada yaranmış qeyri-müəyyən siyasi vəziyyət və bunun neft tədarükünə mümkün təsirləri göstərilir. Xüsusilə investorlar ölkədə baş verən hadisələrin gələcəkdə ixrac həcmlərinə və sanksiya rejiminə necə təsir edəcəyini diqqətlə izləyirlər.
Xəbərlərə əsasən, yanvarın 3-də ABŞ xüsusi təyinatlı qüvvələri Venesuelada əməliyyat həyata keçirib və ölkə prezidenti Nikolas Maduro ilə həyat yoldaşı saxlanılıb. Bildirilir ki, Nikolas Maduronun ABŞ-ın Nyu-York şəhərində federal məhkəmə qarşısına çıxarılması gözlənilir. ABŞ prezidenti Donald Tramp isə daha əvvəl açıqlamasında Venesuelanın müvəqqəti olaraq ABŞ-ın nəzarəti altına keçəcəyini bəyan edib və bu ölkədən neft ixracına tətbiq olunan embarqonun qüvvədə qalacağını vurğulayıb.
Bu məlumatların fonunda neft bazarında təzyiq artıb. Londonun ICE Futures birjasında Brent markalı neftin mart fyuçersləri Moskva vaxtı ilə saat 08:10-a olan məlumata əsasən, bir barel üçün 60,5 ABŞ dolları səviyyəsində ticarət olunub. Bu göstərici əvvəlki sessiyanın bağlanış qiyməti ilə müqayisədə 0,25 dollar və ya 0,41 faiz aşağıdır.
Analitiklər hesab edirlər ki, Venesuela ətrafında vəziyyətin necə inkişaf edəcəyi yaxın günlərdə neft bazarının əsas gündəm mövzularından biri olacaq və qiymətlərdə dalğalanmalar davam edə bilər.
