Mühitin dəyişməsi insanın daxili vəziyyətinə müsbət təsir göstərir. AzPost xəbər verir ki, psixoloq Denis Hakimov səyahətlərin yaşlı nəsil üçün nə üçün faydalı olduğunu açıqlayıb. Mütəxəssisin sözlərinə görə, gündəlik həyat və təkrarlanan rutin zamanla insanın təkcə ətraf aləmi deyil, öz maraqlarını da görməməsinə səbəb olur ki, bu hal xüsusilə yaşlı insanlarda daha qabarıq hiss edilir. Belə vəziyyətdə, hətta qısa bir səfər belə, psixoloji baxımdan “yenilənmə” rolunu oynaya bilər.
Psixoloq bildirir ki, pensiyaya çıxan insanlar həyatlarında müəyyən dəyişikliklərlə üzləşirlər. Gündəlik məişət rejimi yenidən formalaşır, sosial fəallıq azalır, yeni məqsəd və mənalar axtarışı başlayır. Eyni zamanda, sərbəst vaxtın artması asudə vaxtın necə keçirilməsi ilə bağlı çətinliklər yaradır. Enerjinin və diqqətin yönəldiləcəyi sahə olmadıqda isə insan özünü itmiş hiss edə, bu da stresə səbəb ola bilər.
Denis Hakimovun fikrincə, yaşlı insanlar üçün səyahət dünyaya fərqli prizmadan baxmaq imkanı yaradan xüsusi bir hadisədir. Səfərlər zamanı sinir sistemi rahatlayır, emosional gərginlik azalır, əhval-ruhiyyə yüksəlir və ümumi sağlamlıq vəziyyəti yaxşılaşır. Məhz bu səbəbdən, psixoloqlar yaşlı nəslə imkan daxilində səyahət etməyi, yeni yerlər görməyi və aktiv həyat tərzini qorumağı tövsiyə edirlər.
