Ukraynanın sabiq baş naziri, “Batkivşina” partiyasının lideri Yuliya Timoşenko məhkəmə tərəfindən müəyyən edilən 33,3 milyon qrivna (təxminən 760 min dollar) məbləğində girovu ödəyə bilmədiyini bildirib. Bu barədə Rusiya mətbuatı məlumat yayıb.
Jurnalistlərin müvafiq sualına cavab verən Timoşenko “Xeyr” deyərək, tələb olunan vəsaitə malik olmadığını açıqlayıb. Onun sözlərinə görə, göstərilən məbləğin hətta bir hissəsini belə köçürmək imkanı yoxdur.
Siyasətçi iddia edib ki, məhkəmə Ukrayna hakimiyyətinin göstərişi ilə məqsədli şəkildə onun girovu müəyyən olunmuş müddətə — 21 yanvar 2026-cı ilədək ödəyə bilməməsinə çalışır. Timoşenkonun fikrincə, bu addım onun həbs olunmasına nail olmaq məqsədi daşıyır.
Qeyd edək ki, bundan əvvəl Ukraynanın Milli Antikorrupsiya Bürosu (NABU) Yuliya Timoşenkoya deputatlara rüşvət verməyə cəhd ittihamı irəli sürüb və barəsində girov qətimkan tədbiri seçib.
