İspaniyada 1981-ci il 23 fevral dövlət çevrilişi cəhdinə rəhbərlik etmiş sabiq mülki qvardiya podpolkovniki Antonio Tejero 94 yaşında vəfat edib. Bu barədə EFE агентliyi məlumat yayıb.
Məlumata görə, Tejeronun ölümü barədə xəbər hökumətin həmin hadisələrlə bağlı onlarla məxfi sənədi ictimaiyyətə açıqladığı gün yayılıb.
Antonio Tejero 1981-ci il fevralın 23-də silahlı mülki qvardiyaçılarla birlikdə Madriddə parlament binasına daxil olaraq İspaniya Deputatlar Konqresini ələ keçirmişdi. Həmin vaxt parlamentdə Leopoldo Calvo-Sotelonun baş nazir vəzifəsinə namizədliyi üzrə səsvermə keçirilirdi.
Tejeronun “Hamı yerində qalsın!” çağırışı və tavana açdığı atəşlər çevriliş cəhdinin simvoluna çevrilmişdi. Qiyamçılar ölkəni Francisco Franco dövrünün avtoritar idarəçiliyinə qaytarmağa cəhd göstərirdilər.
Lakin çevriliş təşəbbüsü uğursuz oldu. Juan Carlos I televiziya müraciəti ilə konstitusiyanı müdafiə etdiyini bildirdi və qiyamçılara dəstək vermədi. Fevralın 24-də üsyançılar silahı yerə qoydular.
Hərbi qiyamda iştirakına görə Tejero 30 il həbs cəzasına məhkum edilmişdi. O, təxminən 15 il cəza çəkdikdən sonra 1996-cı ildə vaxtından əvvəl azadlığa buraxılmışdı. Son illərini Valensiyada keçirən sabiq zabit ictimaiyyət qarşısında nadir hallarda görünürdü.
Onun vəfatı 1981-ci il uğursuz çevriliş cəhdinin 45-ci ildönümünə təsadüf edir. Tarixçilər həmin hadisəni İspaniyada demokratik sistemin möhkəmlənməsində dönüş nöqtələrindən biri hesab edirlər.
