Vətəndaşın bankla bağlı şikayəti sosial şəbəkələrdə diqqət çəkib. AzPost.az saytı xəbər verir ki, Tofiq Əliyev adlı istifadəçi Leobank ilə yaşadığı problemi ictimai şəkildə paylaşıb.
Vətəndaşın sözlərinə görə, o, ötən ilin noyabrın 11-də Leobankdan 1500 manat kredit götürüb. Dekabrın 12-də ödəniş etmək istədikdə sistemdə texniki səbəbdən ödənişin mümkün olmadığı bildirilib. Daha sonra isə məlum olub ki, problem bankın daxili texniki nasazlığı ilə bağlı olub.
Şikayətçi qeyd edir ki, bu səbəbdən onun adına 41 günlük gecikmə qeydə alınıb. 42-ci gün isə məcbur qalaraq krediti birdəfəlik ödəyib bağladığını bildirir. Onun sözlərinə görə, əgər texniki problem yaranmasaydı, ödənişlərini hissə-hissə və vaxtında edə bilərdi.
Vətəndaş həmçinin bildirir ki, son üç ay ərzində dəfələrlə bankla əlaqə saxlamasına baxmayaraq, ona hər dəfə “müraciətiniz icradadır” cavabı verilir. O, bu vəziyyətin həll olunmamasından narazılıq etdiyini və məsələ ilə bağlı daha məsul şəxslərin müdaxiləsini istəyir.
Şikayətdə qeyd olunur ki, kredit gecikməsi ilə bağlı məlumatın kredit tarixçəsinə təsir etməsi vətəndaş üçün əlavə çətinlik yaradır. Bu səbəbdən o, həm bankdan, həm də müvafiq qurumlardan problemin ədalətli şəkildə araşdırılmasını tələb edir.
Məsələ ilə bağlı qarşı tərəfin mövqeyi hələlik açıqlanmayıb.
