Alman milyarder Fridhelm Lo dünyanın ən qiymətli şəxsi avtomobil kolleksiyalarından birini ictimaiyyətə açıb.
Azpost.info Motorious portalına istinadən xəbər verir ki, təxminən 1,5 milyard dollar dəyərində olan kolleksiya hazırda Frankfurt yaxınlığındakı muzeydə nümayiş olunur.
Nationales Avtomobil Muzeyi adlanan yeni muzeydə müasir hiperkarlardan tutmuş əfsanəvi yarış maşınlarına qədər yüzlərlə nadir avtomobil saxlanılır. Sərgilər arasında Bugatti Centodieci, Mercedes-AMG One və Lamborghini Aventador SVJ kimi modellər, eləcə də Formula 1 avtomobilləri və 24 saatlıq Le Man prototipləri də daxil olmaqla tarixi motorsport avtomobilləri yer alır.
Kolleksiyada xüsusi yeri Ferrari F40 və Mercedes-Benz CLK GTR kimi dövrlərinin simvollarına çevrilmiş ikonik avtomobillər tutur. Sərgi texnologiyanın və sürətin təkamülünü nümayiş etdirən avtomobil mühəndisliyi və dizaynının bir neçə onilliyini əhatə edir.
Muzey çoxsəviyyəli zonalara bölünməklə müasir sərgi məkanı kimi təşkil olunub. Sərgi müntəzəm olaraq yenilənəcək: bəzi avtomobillərin bir neçə aydan bir dəyişdirilməsi planlaşdırılır. Bu da ziyarətçilərin təkrar səfərlərdə yeni nümunələri görməsinə imkan verir.
Giriş haqqı 30 dollara qədərdir. Bu da müşahidəçilərin qeyd etdiyi kimi, sərgilənən avtomobillərin ümumi dəyərinə nisbətən çox azdır.
