“Azərbaycan Televiziya və Radio Verilişləri” QSC-nin nəzdində fəaliyyət göstərən “Sabah” Yaradıcılıq Studiyası bağlanıb.
Azpost.info bildirir ki, bu barədə AZTV-yə yaxın şəxslər bildiriblər.
“Sabah”ın rəhbəri, görkəmli rejissor Ramiz Həsənoğlu birbaşa bunu açılamasa da sosial şəbəkədə paylaşımında işarə vurub. “Sabah” yaradıcılıq studiyası. 15 fevral 1993- 7 aprel 2026. Sonrası sükut…”-deyə o yazıb.
“Sabah” Yaradıcılıq Studiyası Xalq artisti Ramiz Həsənoğlunun təşəbüssü ilə 15 fevral 1993-cü ildə fəaliyyətə başlayıb. Studiya əsas etibarilə televiziya tamaşaları, film-tamaşalar, bədii və sənədli televiziya filmləri, konsert və şou-proqramlar hazırlayır. Fəaliyyətə başladığı ilk 10 ildə 26 televiziya tamaşası hazırlanıb. Studiyanın istehsalı olan “Ac həriflər” televiziya tamaşası “Humay” mükafatına layiq görülüb.
1993-cü ildən 2019-cu ilə qədər “Sabah” Yaradıcılıq Studiyasında müxtəlif müəllif və rejissorların 40-a yaxın ekran işi ərsəyə gətirilib.
2019-cu ildə yenidən aktiv fəaliyyətə başlayan “Sabah” Yaradıcılıq Studiyası “Zəng”, ”Sonuncu”, “Son gecə“, ”Yağlı boya ilə ailə portreti”, “Ocaq yeri”, “Televizor” və s. bədii televiziya filmlərini istehsal edib.
Xalq artisti Ramiz Həsənoğlunun ideya müəllifi olduğu “Yad et məni” silsilə layihəsi çərçivəsində görkəmli şəxsiyyətlər haqqında da bədii-sənədli filmlər çəkilib. Həmçinin “Ustad sözü” silsilə verlişi də “Sabah” Yaradıcılıq Studiyasının istehsalıdır.
AZTV bağlanma səbəbi ilə bağlı heç bir açıqlama verməyib.
