Dərin yuxu
Son illərdə aparılan tədqiqatlar göstərir ki, insan sağlamlığı üçün yalnız yuxunun müddəti deyil, onun rejimi də böyük əhəmiyyət daşıyır. Mütəxəssislər hesab edirlər ki, hər gün fərqli saatlarda yatmaq orqanizmin bioloji ritmini poza bilər.
Azpost.info bildirir ki, ABŞ-ın Kaliforniya ştatında yerləşən Stanford Universitetinin alimləri minlərlə insan üzərində apardıqları araşdırmada müəyyən ediblər ki, yuxu rejimi pozulan şəxslərdə ürək-damar xəstəlikləri, piylənmə və şəkərli diabet riski daha yüksəkdir.
İnsan orqanizmində “sirkadiyal ritm” adlanan daxili bioloji saat fəaliyyət göstərir. Bu mexanizm beynin hipotalamus hissəsində yerləşir və işıq, temperatur, qidalanma kimi amillərlə əlaqəli şəkildə işləyir.
Alimlər bildirirlər ki, hər gün gecə saat 23:00-da yatıb səhər 07:00-da oyanan insanın orqanizmi bu rejimə uyğunlaşır. Lakin bir gün gecə saat 01:00-da, növbəti gün isə 22:00-da yatmaq hormonal balansı poza bilər.
Yaponiyanın Tokio şəhərində aparılan müşahidələr göstərib ki, nizamlı yuxu rejiminə malik insanlar iş qabiliyyəti və diqqət göstəricilərinə görə digərlərindən daha yaxşı nəticələr əldə edirlər.
Kardioloqlar qeyd edirlər ki, yuxu zamanı ürək və qan damarları bərpa olunur. Yuxusuzluq və ya nizamsız yuxu təzyiqin yüksəlməsinə səbəb ola bilər.
Mütəxəssislər tövsiyə edirlər ki, yatmazdan ən azı bir saat əvvəl telefon və kompüter ekranlarından uzaq durmaq, otağı havalandırmaq və kofeinli içkilərdən istifadə etməmək lazımdır.
Araşdırmalar göstərir ki, sağlam həyat tərzinin əsas sütunlarından biri məhz nizamlı yuxudur. Buna görə də alimlər hər gün eyni saatda yatıb oyanmağın uzunmüddətli sağlamlığa müsbət təsir etdiyini bildirirlər.
