Xalq şairi, görkəmli ictimai-siyasi xadim, Vətəndaş Həmrəyliyi Partiyasının sədri Sabir Rüstəmxanlının 80 illik yubiley tədbirləri çərçivəsində növbəti görüş Bakı şəhəri Xətai rayonundakı Heydər Əliyev Parkındakı amfiteatrda baş tutdu.
Şairin, ictimai-siyasi xadimin xalqla bu məkandakı təmasını Xətai rayon icra hakimiyyəti və Azərbaycan Respublikası Mədəniyyət Nazirliyi Bakı Şəhər Mədəniyyət Baş İdarəsi təşkil etmişdi.
Anşlaqla və Sabir Rüstəmxanlının şeirlərinin, şeirlərinə bəstələnən mahnıların müşayiəti ilə keçirilən tədbir görüşə təşrif buyuranların çox marağına səbəb oldu. Xətai rayon icra başçısı Rafiq Quliyevin ev sahibi kimi çıxışından start götürən görüş-tədbir millət vəkillərinin, şair və yazıçıların Sabir bəy haqqında xatirələri ilə davam etdi. Millət vəkilləri Fəzail İbrahimli, Vüqar Rəhimzadə şairi 80 illik yubileyi münasibətilə təbrik edib onun çoxşaxəli yaradıcılığı haqqında danışdılar. Məlum oldu ki, görüş üçün Xətai rayonunun seçilməsi də təsadüf deyil. Çünki Sabir Rüstəmxanlı hələ gənclik yaşlarından uzun illər bu rayonun sakini olmuş və Milli Məclisə ilk dəfə namizədliyini də bu rayondan irəli sürərək böyük səs çoxluğu ilə deputat seçilmişdir.
Sonra çıxış edən türkçü şair Rüstəm Behrudi və ədəbi tənqidçi Əsəd Cahangir də şairin həyat və yaradıcılıq yolundan söz açdılar, şeirlər səsləndirdilər.
Tədbirdə yaddaqalan anlardan biri də “İncilər” rəqs qrupunun gənc oğlanların əllərində qılınc oynatmaqla yubilyarın sözlərinə cəngi üstündə bəstələnmiş “Ulu babam Rüstəmxanın Alapaça atı varmış” şeirinin ifası olub. Musiqi nömrələri ilə çıxış edən əməkdar artistlər Vasif Məhərrəmli, Ramal İsrafilov və digər ifaçıların da çıxışları maraqla qarşılanıb.
Yubilyara Qazaxıstandan, Türksoy tərəfindən təsis edilmiş “Abay Beynəlxalq akademiyasının qızıl medalı” təqdim edildi.
Tədbirin sonunda Sabir Rüstəmxanlı çıxış edərək keçdiyi həyat yolu və yaradıcılığı ilə bağlı bir sıra məqamlardan danışdı və onun üçün doğma olan Xətai rayonunda bu təntənəli görüş-tədbiri düzənləyənlərə təşəkkür etdi.
Azpost.info
