Azərbaycan Respublikasının Mədəniyyət Nazirliyinin maliyyə dəstəyi ilə Tarix sahəsində Maarifləndirməyə Dəstək İctimai Birliyi tərəfindən icra edilən “Rəqəmal Mədəni İrs: QR Bələdçi Şəbəkəsinin Yaradılması” layihəsi çərçivəsində Bakı İlahiyyat Kollecində “Tarixi-mədəni irsin qorunması: Keçmişə hörmət, gələcəyə məsuliyyət” mövzusunda maarifləndirici tədbir keçirilib.
Tədbirdə kollecin tələbələri və gənclər iştirak ediblər. Çıxışlar zamanı Azərbaycanın zəngin tarixi-mədəni irsinin qorunmasının əhəmiyyəti, abidələrin gələcək nəsillərə çatdırılmasında ictimai məsuliyyət və vətəndaş iştirakının rolu müzakirə olunub.
İştirakçılara ölkəmizin müxtəlif bölgələrində yerləşən tarixi abidələr haqqında məlumat verilib, onların qorunması istiqamətində həyata keçirilən dövlət proqramları və ictimai təşəbbüslər barədə ətraflı danışılıb. Tədbir gənclərin sualları və fikir mübadiləsi ilə davam edib.
Maarifləndirici görüş iştirakçılar tərəfindən böyük maraqla qarşılanıb və tarixi irsin qorunmasına dair maarifləndirmə fəaliyyətlərinin davam etdirilməsinin vacibliyi vurğulanıb.
