Son illərdə arıqlamaq istəyən insanların ən çox tətbiq etdiyi üsullardan biri axşam yeməyindən imtina etməkdir. Bir çoxları hesab edir ki, saat 18:00-dan sonra heç nə yeməmək daha sürətli çəki itirməyə kömək edir.
Lakin mütəxəssislər bildirirlər ki, məsələ yeməyin saatında deyil, gün ərzində qəbul olunan ümumi kaloridə və qidalanmanın keyfiyyətindədir.
Azpost.info-nun araşdırmasına görə, axşam uzun müddət ac qalmaq bəzi insanlarda əks effekt yarada bilər. Dietoloqlar qeyd edirlər ki, uzunmüddətli aclıq qanda şəkərin enməsinə səbəb olur. Nəticədə insan gecə saatlarında daha çox yemək istəyir və yüksək kalorili qidalara üstünlük verir.
Araşdırmalar göstərir ki, zülal və liflə zəngin yüngül axşam yeməyi həm toxluq hissini uzadır, həm də gecə maddələr mübadiləsinin normal işləməsinə kömək edir. Məsələn, bişmiş balıq, toyuq əti, kəsmik, tərəvəz salatı və ya qatıq yaxşı seçim hesab olunur.
Mütəxəssislər bildirirlər ki, axşam yeməyini tamamilə buraxmaq əvəzinə, porsiyanı kiçiltmək daha məqsədəuyğundur. Yemək yatmazdan təxminən 2-3 saat əvvəl qəbul edilməlidir.
Dietoloqların sözlərinə görə, arıqlamaq istəyən insanların ən böyük səhvlərindən biri gün ərzində az yeyib axşam saatlarında bütün kalorini qəbul etmələridir. Bu isə həm çəki artımına, həm də yuxu keyfiyyətinin pisləşməsinə səbəb ola bilər.
Qidalanma mütəxəssisləri vurğulayırlar ki, davamlı nəticə əldə etmək üçün qısa müddətli sərt pəhrizlərdən deyil, uzunmüddətli sağlam qidalanma vərdişlərindən istifadə etmək lazımdır.
Sunay
