ABŞ-ın müharibə naziri Pit Heqset bəyan edib ki, Çin və Rusiya ABŞ ilə hərbi qarşıdurma fonunda İranın bəzi fəaliyyətlərinə müxtəlif səviyyələrdə dəstək göstərir.
Azpost.info bildirir ki, bu barədə CNN məlumat yayıb.
Pit Heqset bu açıqlamanı ABŞ Senatının Mənimsəmələr Komitəsində keçirilən dinləmələr zamanı qanunvericilərin suallarını cavablandırarkən verib. “Bu fəaliyyəti cilovlamaq üçün istifadə etdiyimiz çoxsaylı üsullar var. Lakin onların dərinliyi və miqyası ilə bağlı təfərrüatlar məxfi qalmalıdır”, – deyə Pentaqon rəhbəri bildirib.
O əlavə edib ki, bununla belə, Çin və Rusiya müxtəlif istiqamətlərdə və müxtəlif səviyyələrdə İranın həyata keçirdiyi bəzi fəaliyyətlərə dəstək verirlər.
Bu fikirlər Şimali Dakota ştatından respublikaçı senator Con Hovenin İranın hazırkı münaqişədə Çin və Rusiyadan dəstək alıb-almadığı ilə bağlı sualına cavab olaraq səsləndirilib. Eyni sual ABŞ Silahlı Qüvvələrinin Qərargah Rəisləri Komitəsinin sədri, general Den Keynə də ünvanlanıb. General isə mövzunun açıq iclasda müzakirəsini məqsədəuyğun saymadığını bildirib.
“Bu məsələ ilə bağlı açıq, məxfi olmayan dinləmədə danışmağa üstünlük verməzdim”, – deyə Den Keyn qeyd edib.
