İran husilərə dəstəyi artırır. Yəmənə SEPAH komandirləri və raket avadanlığı göndərildiyi iddia olunur
İranın bir müddət əvvəl Yəmənə İslam İnqilabı Keşikçiləri Korpusunun (SEPAH) komandirlərini, hərbi müşavirlərini, eləcə də raket sistemləri və pilotsuz uçuş aparatları üçün avadanlıq göndərdiyi iddia edilir.
Azpost.info xəbər verir ki, bu barədə Reuters agentliyi məlumat yayıb.
Məlumata görə, İranın Mahan Air aviaşirkətinə məxsus təyyarə ilə Yəmənə 10-21 nəfər arasında SEPAH nümayəndəsi, o cümlədən yüksək rütbəli zabitlər göndərilib. Mənbələrin bildirdiyinə görə, Səna hava limanına endirilməsi planlaşdırılan təyyarə hava limanına endirilən zərbələrdən sonra marşrutunu dəyişərək Hudeydə şəhərinə eniş edib.
İddialara əsasən, yükün tərkibində raket silahları və pilotsuz uçuş aparatları üçün ehtiyat hissələri, həmçinin husilərin fəaliyyətinin maliyyələşdirilməsi məqsədilə istifadə olunacağı ehtimal edilən qızıl da olub.
Reuters qeyd edir ki, bu addım İranın husilərə dəstəyini daha da gücləndirmək cəhdi kimi qiymətləndirilir. Husilər artıq on ildən çoxdur ki, Səudiyyə Ərəbistanının dəstəklədiyi və beynəlxalq ictimaiyyət tərəfindən tanınan Yəmən hökumətinə qarşı silahlı mübarizə aparırlar.
Qruplaşma bu müddət ərzində dəfələrlə Fars körfəzi ölkələrinə, eləcə də Qırmızı dənizdən keçən ticarət gəmilərinə raket və pilotsuz uçuş aparatları ilə hücumlar həyata keçirib.
İran Xarici İşlər Nazirliyi yayılan məlumatlara hələlik münasibət bildirməyib. Tehran daha əvvəl dəfələrlə husilərə raket texnologiyası və hərbi dəstək verdiyi barədə iddiaları təkzib edib.
