Tatarıstana
İyulun 24-də səhər saatlarında Rusiyanın Sankt-Peterburq şəhəri hərbi təyinatlı pilotsuz uçuş aparatlarının (PUA) hücumuna məruz qalıb.
Bu barədə şəhərin qubernatoru Aleksandr Beqlov sosial şəbəkə hesabında məlumat verib.
Onun sözlərinə görə, zərbələr Moskva şossesində yerləşən mülki infrastruktur obyektlərinə endirilib. Hazırda hadisənin nəticələrinin aradan qaldırılması istiqamətində işlər aparılır. Qubernator bildirib ki, hücumun qarşısının alınması üçün hava hücumundan müdafiə (HHM) sistemləri fəaliyyət göstərir.
“Həmin qərargaha şəxsən rəhbərlik edirəm. Şəhər xidmətlərinin fəaliyyəti və qurumlararası koordinasiya təmin edilir”, – deyə Beqlov qeyd edib.
Hazırda xəsarət alanlar və dağıntılar barədə rəsmi məlumat verilməyib.
Şəhər sakinlərinə sakitliyi qorumaq və yalnız rəsmi məlumatlara etibar etmək tövsiyə olunub. Rəsmilər təhlükəsizlik vəziyyətinin nəzarət altında olduğunu bildiriblər.
Bundan əvvəl Leninqrad vilayətinin qubernatoru Aleksandr Drozdenko bölgənin hava məkanında məhv edilən pilotsuz uçuş aparatlarının sayının 50-yə çatdığını açıqlamışdı. Onun sözlərinə görə, hava hücumundan müdafiə sistemləri gecə boyu fəaliyyət göstərib və hücumun dəf edilməsi prosesi davam edib. Daha əvvəl vurulan PUA-ların sayının 33 olduğu bildirilirdi.
Hazırkı məlumata əsasən, Leninqrad vilayətində də xəsarət alanlar və ya yerüstü dağıntılar barədə rəsmi məlumat yoxdur.
