Ermənistanın Baş naziri Nikol Paşinyanla Rusiya Prezidenti Vladimir Putin arasında telefon danışığı olub.
Azpost.info xəbər verir ki, Ermənistan hökumətinin yaydığı məlumata görə, tərəflər Ermənistan-Rusiya münasibətlərinin gündəliyində duran məsələləri, xüsusilə ikitərəfli iqtisadi əlaqələrdə yaranmış problemləri müzakirə ediblər.
Paşinyan Rusiya bazarına Ermənistan mənşəli məhsulların ixracına tətbiq olunan məhdudiyyətlərin Ermənistan-Rusiya müqavilə-hüquq bazasına və Avrasiya İqtisadi İttifaqının qaydalarına zidd olduğunu bildirib. O, Putindən bu problemlərin aradan qaldırılması üçün müvafiq tədbirlərin görülməsini xahiş edib.
Telefon danışığı zamanı Ermənistanın Avropa İttifaqına üzvlüklə bağlı mümkün referendum məsələsinə də toxunulub. Paşinyan bildirib ki, belə referendum yalnız Ermənistanın Aİ-yə rəsmi üzvlük ərizəsi təqdim etməsindən və bu məsələnin praktik müstəviyə keçməsindən sonra mümkün ola bilər.
Baş nazir vurğulayıb ki, Ermənistan hökuməti bütün bu məsələlərin açıq, tərəfdaşlıq və dostluq ruhunda dialoq yolu ilə həllinə hazırdır.
