Gəzinti zamanı baldırda yaranan ağrı təkcə yorğunluq əlaməti olmaya bilər. Bu, qan damarlarında ciddi problemlərin göstəricisi də ola bilər. Tibb elmləri namizədi, ali kateqoriyalı həkim Aleksey Frantseviç “vitrin sindromu” adlanan vəziyyətin səbəbləri və təhlükələri barədə danışıb.
Bu barədə “Lenta.ru” məlumat yayıb.
Həkimin sözlərinə görə, bu sindrom zamanı ağrı adətən hər dəfə eyni məsafəni qət etdikdən sonra başlayır və bir neçə dəqiqə dayandıqda azalır.
“Belə halda damarları mümkün qədər tez yoxlatmaq lazımdır. Müalicə aparılmasa, ağrısız yerimək mümkün olan məsafə getdikcə qısala bilər”, – deyə mütəxəssis bildirib.
Səbəb damarların daralması ola bilər
Bu vəziyyətin əsas səbəblərindən biri aterosklerozdur. Xəstəlik zamanı damarların divarlarında xolesterin lövhəcikləri yaranır. Onlar damarları daraldaraq qanın əzələlərə kifayət qədər oksigen çatdırmasına mane olur.
Gəzinti zamanı əzələlərin oksigenə tələbatı artır. Qan dövranı bu ehtiyacı ödəyə bilmədikdə ayaqlarda ağrı, yanma və ağırlıq hissi yarana bilər.
Kimlər daha çox risk altındadır?
Cərrahın xəbərdarlığına görə, qan dövranının pozulması vaxtında müalicə edilmədikdə ağır fəsadlara səbəb ola bilər.
Damar xəstəlikləri riski xüsusilə aşağıdakı qruplarda yüksəkdir:
-siqaret çəkənlər;
-60 yaşdan yuxarı şəxslər;
-şəkərli diabeti olanlar;
-arterial təzyiqi yüksək olanlar;
-qanda xolesterinin səviyyəsi yüksək olanlar.
Əgər gəzərkən ayaq ağrısı mütəmadi təkrarlanır və qısa müddət dincəldikdən sonra keçirsə, həkimə müraciət etmək vacibdir. Bu əlaməti yalnız yorğunluqla əlaqələndirmək düzgün deyil.
Erkən müayinə damar problemini vaxtında müəyyənləşdirməyə və ağırlaşma riskini azaltmağa kömək edə bilər.
