İran Avropa ölkələrini Hörmüz boğazına hərbi gəmilər göndərməkdən çəkindirərək sərt xəbərdarlıq edib.
İran xarici işlər nazirinin müavini Kazem Qaribabadinin sözlərinə görə, Hörmüz boğazına yaxınlaşacaq istənilən Avropa hərbi gəmisi Tehran tərəfindən qanuni hədəf hesab ediləcək.
Diplomat bu barədə İran dövlət televiziyasına müsahibəsində danışıb.
Qaribabadi bildirib ki, ABŞ və bəzi Avropa ölkələrinin strateji əhəmiyyətə malik Hörmüz boğazında sərbəst gəmiçiliyi bərpa etmək cəhdləri İran üçün qəbuledilməzdir.
O vurğulayıb ki, Tehran boğazın müharibədən əvvəlki statusuna qaytarılmasına razı olmayacaq: “Əgər Hörmüz boğazı müharibədən əvvəlki vəziyyətinə qayıtsa, bizim müharibədə qazandığımız qələbə tam hesab edilə bilməz”.
Nazir müavini əlavə edib ki, Hörmüz boğazına nəzarət İran üçün yeni müdafiə imkanına və milli təhlükəsizliyin mühüm elementinə çevrilib.
Qeyd edək ki, dünya üzrə neft və mayeləşdirilmiş təbii qaz tədarükünün təxminən beşdə biri Hörmüz boğazından keçir. ABŞ və müttəfiqləri bu strateji su yolunda sərbəst gəmiçiliyin bərpasını dəstəkləsələr də, İran bölgəyə nəzarət hüququnda israrlıdır.
