Azərbaycan Kinematoqrafçılar İttifaqının (AKİ) İdarə Heyətinin üzvləri təşkilatın fəaliyyəti ilə bağlı narahatlıq doğuran bəyanat yayıb.
İyulun 30-da keçirilən İdarə Heyətinin iclasından sonra yayılan bəyanatda bildirilib ki, bəzi idarə heyəti üzvlərinin məsuliyyətsiz addımları nəticəsində təşkilatın hüquqi statusu təhlükə altına düşüb.
Qeyd olunub ki, yaranmış vəziyyət səbəbindən təşkilatın vergi səhifəsi bağlanıb, əmək müqavilələrinin yenilənməsi mümkün olmayıb, həyata keçirilən layihələrin icrası isə faktiki olaraq dayanıb.
İdarə Heyəti hesab edir ki, mövcud böhrandan yeganə çıxış yolu Nizamnamənin tələblərinə uyğun olaraq konfransın keçirilməsi və sədr seçkisinin təşkil olunmasıdır.
Bəyanatda vurğulanır ki, konfransın keçirilməsinin gecikdirilməsi Azərbaycan Kinematoqrafçılar İttifaqını ləğv olunmaq təhlükəsi ilə üz-üzə qoya bilər.
Bununla əlaqədar İdarə Heyəti AKİ-nin birinci katibi və icraçı katibindən konfransın 2026-cı il sentyabrın 5-dən gec olmayaraq keçirilməsi üçün bütün zəruri təşkilati addımların atılmasını tələb edib.
