“Rusiya Dəmir Yolları” (RJD) şirkəti qara metalların və alüminium oksidinin (qlinozem) daşınmasına bir sıra tarif güzəştləri tətbiq edəcək.
Azpost.info bildirir ki, bu barədə şirkətin açıqlamasına istinadən TASS agentliyi məlumat yayıb.
Bildirilib ki, qəbul edilən tarif qərarlarının məqsədi dəmir yolu ilə daşınan yüklərin həcmini artırmaqdır.
Qərara əsasən, 2027-ci il iyunun 30-dək Maqnitoqorskdan Rusiya daxilində daşınan qara metallara, həmçinin bu məhsulların Qazaxıstanla sərhəd keçid məntəqələri (Kanisay, Orsk-Novıy Qorod və Kartalı stansiyaları) və Dağıstandakı Samur sərhəd-keçid məntəqəsi vasitəsilə Azərbaycana ixracına 50 faiz tarif endirimi tətbiq olunacaq.
Bundan başqa, Uzaq Şərq limanları yaxınlığındakı stansiyalardan Şərqi Sibir və Krasnoyarsk dəmir yollarının stansiyalarına qlinozem daşımalarına da 12,8 faiz güzəşt veriləcək.
Bu endirim yalnız Uzaq Şərq Dəmir Yolunda yük boşaltdıqdan sonra boş qalan yarımvaqonlarla həyata keçirilən daşımalara şamil ediləcək.
