İran ətrafında yaranan hərbi gərginlik və son İran-İsrail müharibəsinin ortaya çıxardığı təhlükələr Azərbaycanın hava hücumundan müdafiə (HHM) imkanlarını daha da gücləndirməsinə səbəb olub.
Bu barədə “Forbes” jurnalında dərc olunan məqalədə bildirilir.
Nəşr qeyd edir ki, Azərbaycan son illərdə hava məkanının qorunması istiqamətində mühüm addımlar atıb. Bu çərçivədə ölkə Pakistan istehsalı olan 40 ədəd “JF-17C Block III” çoxməqsədli qırıcı təyyarəsini silahlanmaya qəbul edib.
Məqalədə vurğulanır ki, müasir radar sistemləri və uzaqmənzilli “hava-hava” raketləri ilə təchiz olunan bu qırıcılar Azərbaycan Hərbi Hava Qüvvələrinin döyüş imkanlarını əhəmiyyətli dərəcədə artıracaq.
“Forbes” yazır ki, Bakı bununla kifayətlənmir. Azərbaycan İsrail, Türkiyə və Çin istehsalı olan müxtəlif hava hücumundan müdafiə sistemləri, radarlar və digər hərbi vasitələr hesabına çoxqatlı hava müdafiə şəbəkəsi formalaşdırır.
Nəşrin fikrincə, İran-İsrail müharibəsi pilotsuz uçuş aparatlarının, qanadlı və ballistik raketlərin yaratdığı təhlükəni bir daha nümayiş etdirib. Azərbaycan da bu təcrübəni nəzərə alaraq hava məkanının müdafiəsini daha da gücləndirmək qərarına gəlib.
Jurnal Azərbaycanın İranla uzun dövlət sərhədinə malik olduğunu xatırladaraq bildirir ki, regionda təhlükəsizlik risklərinin artdığı bir vaxtda etibarlı hava müdafiəsinin təmin edilməsi ölkənin əsas prioritetlərindən birinə çevrilib.
Məqalə müəllifi hesab edir ki, yeni nəsil qırıcıların və müasir HHM sistemlərinin istismara verilməsi Azərbaycanın pilotsuz uçuş aparatları və raket təhdidlərinə qarşı imkanlarını əhəmiyyətli dərəcədə artıracaq.
“Forbes”in qənaətinə görə, həyata keçirilən modernizasiya Azərbaycanın Cənubi Qafqazda ən güclü hava müdafiə şəbəkələrindən birinə malik olmasına mühüm töhfə verəcək.
