“Azərbaycan Əlil Velosipedçilərə Dəstək” İctimai Birliyi tərəfindən icra olunan “Veloreabilitasiya” layihəsinin yekun mərhələsi olan Final Yarış günü uğurla təşkil edilib. Layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilib.
Layihənin əsas məqsədi inklüziv mühit yaratmaqla insanların fiziki aktivliyini artırmaq, onların sosial və ictimai həyata inteqrasiyasını gücləndirməkdir.
Layihənin yekun tədbiri olan Final Yarış günündə 25 nəfər iştirakçı müxtəlif kateqoriyalar üzrə əlil velosipedlərinin sürüşünü həyata keçirərək öz bacarıqlarını nümayiş etdirib. Yarış iştirakçıları həm sürət, həm də texniki bacarıqlar baxımından qiymətləndirilib və sağlam rəqabət mühitində mübarizə aparıblar.
Yarışın sonunda iştirakçıların nəticələri layihə rəhbəri Amid Həsənquliyev ilə birgə təhlil və müzakirə olunub. Müzakirələr zamanı iştirakçıların inkişaf göstəriciləri və yarış performansları dəyərləndirilib.
Nəticələrə əsasən hər kateqoriya üzrə yüksək nəticə göstərən ümumilikdə 10 nəfər iştirakçı xüsusi hədiyyələr ilə təltif olunub.
“Veloreabilitasiya” layihəsi əlilliyi olan şəxslərin fiziki reabilitasiyasına, sosial aktivliyinin artırılmasına və cəmiyyətə inteqrasiyasına töhfə verməklə yanaşı, inklüziv idman imkanlarının genişləndirilməsi istiqamətində mühüm addım kimi qiymətləndirilir. Layihə çərçivəsində əldə olunan nəticələr gələcəkdə bu sahədə yeni təşəbbüslərin həyata keçirilməsi üçün də əhəmiyyətli təcrübə formalaşdırıb.
Fotolar
