İnsan ömrünün təbii həddi ilə bağlı uzun illərdir davam edən müzakirələrə alimlər yeni cavab veriblər. Araşdırmaya görə, sağlam həyat tərzi keçirən insanın tibbi müdaxilə olmadan çata biləcəyi maksimum yaş təxminən 115 ildir.
Nəticə Niderlandın Tilburg Universiteti və Erasmus Rotterdam Universiteti alimlərinin apardığı araşdırmaya əsaslanır. Tədqiqat çərçivəsində 2017-ci ilə qədərki 30 il ərzində vəfat etmiş 75 mindən çox insanın məlumatı təhlil edilib.
Araşdırmaya əsasən, əlverişli şəraitdə qadınların maksimal ömür həddi 115,7 il, kişilərdə isə 114,1 il hesab olunur. Alimlər bildirirlər ki, 90 yaşdan yuxarı insanlar kifayət qədər çox olsa da, 115 yaş həddini keçmək olduqca nadir hallarda baş verir.
Rekord hələ də dəyişməyib
Tarixdə ən uzun ömür sürmüş insan kimi Jeanne Louise Calment tanınır. O, 122 il 164 gün yaşayıb və bu rekord bu günə qədər yenilənməyib.
Fransız uzunömürlü 1875-ci ildə anadan olub, 1997-ci ildə vəfat edib. O, iki dünya müharibəsini, telefonun və avtomobilin geniş yayılmasını, eləcə də bir çox tarixi hadisələri görən nadir insanlardan biri olub.
Məlumatlara görə, Kalmanın uzunömürlülüyündə sakit həyat tərzi, fiziki aktivlik və balanslı qidalanmanın rolu olub. O, üzgüçülük, tennis, velosiped sürmə və konkisürmə ilə məşğul olub, 85 yaşında isə qılıncoynatmaya başlayıb.
Maraqlıdır ki, o, zeytun yağından həm qidalanmada, həm də dəriyə qulluqda istifadə edir, eyni zamanda 115 yaşına qədər siqaret çəkir və ara-sıra bir qədəh şərab içirdi. Bununla belə, mütəxəssislər vurğulayırlar ki, bu vərdişlər uzunömürlülüyün səbəbi kimi qiymətləndirilə bilməz və hər bir insanın genetik xüsusiyyətləri fərqlidir.
Alimlərin fikrincə, sağlam qidalanma, müntəzəm fiziki aktivlik, normal çəki, keyfiyyətli yuxu və xroniki xəstəliklərə nəzarət ömrün uzanmasına kömək etsə də, insan ömrünün bioloji həddi təxminən 115 il olaraq qalır.
