Səyahətə hazırlaşarkən yaranan tələskənlik səbəbindən evdə görülməli vacib işlər bəzən unudulur.
Real Simple nəşri istirahət zamanı evinizi təhlükəsiz saxlamağa və rahatlıqla dincəlməyə kömək edəcək 10 sadə tövsiyədən ibarət siyahı hazırlayıb.
Evin təhlükəsizliyini təmin edin
Bütün girişləri yoxlayın. Təkcə əsas qapını deyil, birinci mərtəbədəki pəncərələri, qarajı, həyət qapısını və digər girişləri də bağlı olduğundan əmin olun.
Təhlükəsizlik sistemlərini yoxlayın. Müşahidə kameralarının enerji səviyyəsini, internet bağlantısını və kameraların görüntüsünü bağlayan maneələrin olub-olmadığını yoxlayın.
Evdə kimsə varmış görüntüsü yaradın. Qonşularınızdan poçtu götürməyi xahiş edin, avtomobilinizi həmişəki yerində saxlayın və axşam saatlarında işıqların avtomatik yanması üçün taymer və ya “ağıllı” rozetkalardan istifadə edin.
Tüstü və qaz detektorlarını yoxlayın. Siqnalizasiya cihazlarının test düyməsini basaraq işlək vəziyyətdə olduqlarını yoxlayın, lazım gələrsə batareyaları dəyişdirin.
Yanğın və qəza riskini azaldın
Elektrik cihazlarını şəbəkədən ayırın. Toster, qəhvə dəmləyən aparat, fen və digər məişət texnikasını elektrikdən ayırın. Xüsusilə litium-ion batareyalı cihazları (elektrik skuterləri, elektrik velosipedləri və s.) nəzarətsiz şəkildə enerji yığımında qoymaq olmaz.
Su təchizatını bağlayın. Mümkünsə, evin əsas su kranını bağlayın. Bu mümkün deyilsə, heç olmasa paltaryuyan və qabyuyan maşınlara gedən su xəttini bağlayın. Qazla işləyən su qızdırıcılarında isə “Məzuniyyət” (“Vacation”) rejimini aktivləşdirin.
Rütubət və kifin yaranmasının qarşısını alın
Məişət texnikasında qalan suyu boşaldın. Çaydan, qəhvə dəmləyən aparat, paltaryuyan və qabyuyan maşınlarda qalan suyu boşaldın. Mütəxəssislərin sözlərinə görə, qalan nəmlik cəmi 24-48 saat ərzində kif əmələ gəlməsinə səbəb ola bilər.
Evdə iqlimə nəzarəti saxlayın. Kondisioneri tam söndürmək əvəzinə onu rütubəti 35-50 faiz səviyyəsində saxlayan rejimdə işlədin. Bu, taxta mebellərin, divar örtüklərinin və boyanın zədələnməsinin, eləcə də göbələk və kifin yaranmasının qarşısını almağa kömək edəcək.
