Azərbaycan və Gürcüstan arasında sərnişin daşımalarının genişləndirilməsi istiqamətində yeni addım atılır. Bakı–Tbilisi marşrutu üzrə əlavə sərnişin reysinin təşkili ilə bağlı hazırlıq işlərinə başlanılıb.
Azpost.info xəbər verir ki, məsələ Azərbaycan və Gürcüstanın dəmir yolu administrasiyalarının, eləcə də aidiyyəti dövlət qurumlarının rəhbər şəxslərinin iştirakı ilə Böyük-Kəsik stansiyasında keçirilən görüşdə müzakirə olunub.
Görüşdə bildirilib ki, yeni reysin təşkili çərçivəsində sərnişinlərin rahatlığının artırılması üçün sərhəd və gömrük prosedurlarının sadələşdirilməsi, nəzarət proseslərinin daha çevik və müəyyən olunmuş vaxt çərçivəsində həyata keçirilməsi əsas prioritetlərdən biridir.
Tərəflər həmçinin beynəlxalq yük və sərnişin daşımalarının səmərəliliyinin artırılması, sərhəd keçidlərinin sürətləndirilməsi və Orta Dəhlizin rəqabət qabiliyyətinin gücləndirilməsi istiqamətində fikir mübadiləsi aparıblar.
Görüşdə rəqəmsal həllərin tətbiqi də əsas mövzulardan biri olub. “Azərbaycan Dəmir Yolları” QSC (ADY) ilə Gürcüstan Dəmir Yolları arasında qatarlar və yüklər barədə məlumatların real vaxt rejimində elektron mübadiləsinin genişləndirilməsi, eləcə də gömrük orqanlarının informasiya sistemlərinin inteqrasiyası ilə bağlı qərarlar qəbul edilib.
Bundan başqa, yük qatarlarının hərəkətinin sürətləndirilməsi məqsədilə vaqonlara texniki baxış prosedurlarının optimallaşdırılması barədə razılıq əldə olunub. Yeni yanaşmaya əsasən, təkrarlanan texniki baxışlar ləğv ediləcək və bu dəyişiklik sərhəddən keçid müddətini iki dəfə azaltmağa imkan verəcək.
ADY bildirir ki, son illər Böyük-Kəsik istiqamətində həyata keçirilən infrastruktur layihələri nəticəsində sərhəd keçid məntəqəsinin ötürücülük qabiliyyəti artırılıb, dəmir yolu infrastrukturu müasir tələblərə uyğun yenilənib və rəqəmsal idarəetmə sistemləri tətbiq olunub.
Yeni qərarların həm Bakı–Tbilisi sərnişin daşımalarının inkişafına, həm də Orta Dəhliz üzrə beynəlxalq yükdaşımaların daha çevik həyata keçirilməsinə mühüm töhfə verəcəyi gözlənilir.
