Rusiyanın iri şəhərlərində yaşayan və uzun müddət Ukraynadakı müharibənin gündəlik həyatlarına təsir etməyəcəyini düşünən insanlar artıq fərqli reallıqla üz-üzə qalıblar.
Azpost.info xəbər verir ki, ABC nəşrinin hazırladığı məqalədə Ukraynanın pilotsuz uçuş aparatlarının hücumları, yüksək inflyasiya və iqtisadi problemlərin Rusiya cəmiyyətində müharibəyə münasibəti dəyişdirdiyi bildirilir.
Müharibə artıq arxa cəbhəyə çatıb
Məqalədə qeyd olunur ki, müharibə tədricən Rusiya ərazisinə keçərək insanların təhlükəsizlik hissini zəiflədib.
Moskva sakini Svetlana bildirib ki, paytaxt yaxınlığındakı bağ evində əvvəllər rahatlıq tapırdı. Lakin indi həmin ərazi gecələr partlayış səsləri ilə müşayiət olunur.
Onun sözlərinə görə, bir gecə ərzində evinin yaxınlığında altı güclü partlayış baş verib və bu hadisə müharibənin artıq qəzet səhifələrindən real həyata keçdiyini göstərib.
Sankt-Peterburq sakini Yekaterina isə deyib ki, Ukraynanın uzaqmənzilli dron hücumları nəticəsində insanlar özlərini əvvəlki kimi təhlükəsiz hiss etmirlər. Davamlı gərginlik səbəbindən bir çox sakin stressi alkoqol və ya antidepressantlarla azaltmağa çalışır.
Bahalaşma və yanacaq çatışmazlığı
ABC yazır ki, hava hücumları ilə yanaşı, iqtisadi problemlər də əhalinin narazılığını artırır.
Neft emalı zavodlarına endirilən zərbələr nəticəsində ölkədə yanacaq qıtlığı yaranıb və bir çox yanacaqdoldurma məntəqələrində uzun növbələr müşahidə olunur.
Bundan başqa, iri logistika mərkəzlərinə hücumlar çatdırılma zəncirini pozub və kiçik sahibkarlara ciddi ziyan vurub.
Məqalədə qeyd edilir ki, 2024–2026-cı illər ərzində Rusiyada kartofun qiyməti 167 faiz, şokoladın qiyməti isə 125 faiz artıb. Kommunal xidmətlərin tarifləri də əhəmiyyətli dərəcədə bahalaşıb.
Müharibəyə dəstək zəifləyir
Nəşrin yazdığına görə, sosial-iqtisadi vəziyyətin ağırlaşması əhalinin əhvalına da təsir edib.
Müstəqil “Levada” mərkəzinin məlumatına əsasən, istehlakçı əhval-ruhiyyəsi son dörd ilin ən aşağı səviyyəsinə düşüb. Sosioloqlar həmçinin Kremlin siyasətinə dəstəyin də genişmiqyaslı müharibənin başlanmasından bəri ən aşağı göstəricilərdən birinə endiyini bildirirlər.
NEST Mərkəzinin baş elmi əməkdaşı Con Lof hesab edir ki, Rusiya cəmiyyətində müharibənin məqsədi ilə bağlı suallar getdikcə daha çox səslənir. Onun fikrincə, rəsmi təbliğat yanacaq qıtlığını və bahalaşmanı müxtəlif səbəblərlə izah etməyə çalışsa da, reallığı gizlətmək getdikcə çətinləşir.
ABC sonda vurğulayır ki, hətta əvvəllər hakimiyyətin siyasətini açıq şəkildə dəstəkləyən insanlar belə indi öz mövqelərini yenidən nəzərdən keçirirlər və cəmiyyətin müxtəlif təbəqələrində müharibə yorğunluğu açıq hiss olunur.
N.Talıblı
