Yaş artdıqca bir çox insan boyunun əvvəlkindən bir qədər qısaldığını müşahidə edir. Mütəxəssislər bildirirlər ki, bu müəyyən həddə qədər təbii proses hesab olunsa da, 5–10 santimetr və ya daha çox boy itkisi dayaq-hərəkət sistemi ilə bağlı ciddi problemlərin, xüsusilə osteoporozun əlaməti ola bilər.
Azpost.info bildirir ki, bu barədə Cleveland Clinic-ə istinadən revmatoloq, tibb üzrə doktor Ebbi Abelson məlumat verib.
Boy niyə qısalır?
Sümüklərin sıxlığının azalması
Yaşlandıqca sümüklər tədricən möhkəmliyini itirir və daha kövrək olur. Bu dəyişikliklər xüsusilə onurğada özünü göstərir. Fəqərələr nazilir və kiçik sıxılma sınıqları yarana bilər.
Nəticədə fəqərələrin hündürlüyü azalır, onurğa sütunu qısalır və insanın boyu aşağı düşür.
Onurğaarası disklərdə dəyişikliklər
Fəqərələr arasında yerləşən disklər onurğanın təbii amortizatoru rolunu oynayır. Yaş artdıqca onlar su itirir, elastikliyini azaldır və yastılaşır.
Bu səbəbdən fəqərələr arasındakı məsafə azalır. Onurğada çox sayda disk olduğu üçün hər birində baş verən kiçik dəyişikliklər zamanla ümumilikdə bir neçə santimetr boy itkisinə səbəb ola bilər.
Əzələlərin zəifləməsi və duruşun pozulması
Əzələ kütləsinin azalması skeleti qısaltmasa da, zəifləmiş əzələlər onurğanı əvvəlki kimi dəstəkləyə bilmir. Nəticədə insan qamətini əyir, qozbelləşir və olduğundan daha alçaq görünür.
Nə vaxt həkimə müraciət etmək lazımdır?
Mütəxəssislərin sözlərinə görə, boyun 5–10 santimetr azalması, xüsusilə bu dəyişiklik qısa müddətdə baş veribsə, osteoporozun xəbərdaredici əlaməti ola bilər.
Aşağıdakı hallarda mütləq müayinədən keçmək tövsiyə olunur:
boyun nəzərəçarpacaq dərəcədə qısalması;
qamətin əyilməsi və ya qozbelləşmə;
davamlı bel ağrıları;
kiçik zərbə və ya yüngül yüklənmədən sonra sınıqların yaranması.
Həkimlər qeyd edirlər ki, osteoporoz uzun müddət heç bir aşkar simptom vermədən inkişaf edə bilər. Bir çox hallarda xəstəlik yalnız onurğa fəqərəsinin sıxılma sınığı və ya sümüklərin kövrəkliyi ilə bağlı başqa travmadan sonra aşkarlanır.
N.Talıblı
