Beyin
İnsan beyni kainatın ən mürəkkəb “kompüterlərindən” biri hesab olunur. Alimlər onu onilliklərdir araşdırsalar da, hələ də bütün sirlərini aça bilməyiblər.
Araşdırmalara görə, insan beynində təxminən 86 milyard sinir hüceyrəsi fəaliyyət göstərir. Beyin bədən çəkisinin cəmi 2 faizini təşkil etsə də, orqanizmdə istifadə olunan enerjinin təxminən 20 faizini sərf edir. İnsan beyni yuxu zamanı da aktiv işləyir. Məhz bu dövrdə gün ərzində əldə olunan məlumatlar yaddaşa köçürülür. Beyin ağrı hiss etmir. Buna görə də bəzi beyin əməliyyatları xəstə ayıq vəziyyətdə olarkən həyata keçirilə bilir.
Alimlər hesab edirlər ki, insan beyni ömür boyu yeni sinir əlaqələri yaratmaq qabiliyyətinə malikdir. Xarici dil öyrənmək, kitab oxumaq və yeni bacarıqlar əldə etmək bu prosesi sürətləndirir. Mütəxəssislər qeyd edirlər ki, müntəzəm fiziki aktivlik, keyfiyyətli yuxu və balanslı qidalanma beynin fəaliyyətini uzun illər yüksək səviyyədə saxlamağa kömək edir.
Bu səbəbdən sağlam həyat tərzi təkcə ürək üçün deyil, beynin gənc qalması üçün də vacib hesab olunur.
