Binaların damlarında toplanan yağış suyundan isti havalarda damların soyudulması üçün istifadə etmək kondisionerlərə sərf olunan elektrik enerjisinin istehlakını azalda, şəhərlərdə temperaturu aşağı sala və ekstremal istilər dövrünün müddətini qısalda bilər.
Azpost.info bildirir ki, bu nəticəyə Mançester Universitetinin alimləri gəliblər. Tədqiqatın nəticələri Earth’s Future jurnalında dərc olunub.
Alimlər damlardan yağış suyunu toplayan, onu xüsusi çənlərdə saxlayan və isti hava zamanı avtomatik şəkildə damların üzərinə püskürdən sistemin modelini hazırlayıblar. Nümunə kimi Tokiodan istifadə edilib.
Model hesablamaları göstərib ki, damların soyudulması binaların həddindən artıq qızmasının qarşısını alır. Bunun sayəsində kondisionerlər daha az işləyir. Bu isə soyutma sistemlərinin ətraf mühitə buraxdığı istilik miqdarını azaldır və nəticədə şəhərdə havanın temperaturunun əlavə olaraq aşağı düşməsinə səbəb olur.
Beləliklə, həm ekstremal isti günlərin sayı, həm də isti havanın intensivliyi azalır.
Tədqiqatın ən maraqlı nəticələrindən biri sistemin səmərəliliyində əsas amilin çənlərin həcmi və hətta püskürdən suyun miqdarı deyil, sistemin işə salınma vaxtı olmasıdır.
Çənlərin tutumunun artırılması yalnız cüzi əlavə effekt verib. Həddindən artıq suyun istifadəsi isə hər zaman soyutmanı yaxşılaşdırmayıb. Bunun səbəbi suyun bir hissəsinin buxarlanmağa kifayət qədər vaxt tapmamasıdır.
Tədqiqat müəlliflərinin sözlərinə görə, texnologiyanın səmərəliliyi xüsusilə isti illərdə artır. Bu isə onu şəhərlərin iqlim dəyişikliyinə uyğunlaşması üçün perspektivli vasitələrdən birinə çevirə bilər.
Sistemin daha bir üstünlüyü güclü yağışlar zamanı kanalizasiya və digər sistemlərə daxil olan leysan sularının həcmini azaltmasıdır.
Tədqiqatçılar hesab edirlər ki, yağış suyundan binaların soyudulması üçün istifadə şəhərləri iqlim dəyişikliyinin nəticələrindən qorumaq və ekstremal hava şəraitinə davamlılığını artırmaq üçün kompleks tədbirlərin bir hissəsinə çevrilə bilər.
