NASA-nın Ames Tədqiqat Mərkəzinin keçmiş elmi əməkdaşı, Nyu-York Dövlət Universitetinin Olbani kampusunun astrofiziki Kevin Knut hesab edir ki, əgər yadplanetli sivilizasiyalar həqiqətən Yer kürəsini ziyarət ediblərsə, bunun böyük ehtimalla 1 milyon ildən də çox əvvəl baş verdiyini düşünmək olar.
Alim bu qənaətini hipotetik kosmik sivilizasiyaların qalaktikada yayılmasının kompüter modelləşdirilməsinə əsaslandırıb. Bu barədə Popular Mechanics jurnalı yazıb.
Knutun sözlərinə görə, o, ulduzlararası uçuşlar həyata keçirə bilən 10 milyon sivilizasiyanın inkişafını modelləşdirib. Hesablamalar zamanı kosmik gəmilərin sürəti, sivilizasiyaların mövcudluq müddəti, uçuş məsafəsi və yeni ulduz sistemlərini koloniyalaşdırmaq ehtimalı nəzərə alınıb.
Hesablamalar göstərib ki, ulduzlararası sivilizasiyanın Yerə çatma ehtimalı təxminən 0,000405 faizdir.
Lakin belə bir ziyarət həqiqətən baş veribsə, modelə əsasən bunun yaxın keçmişdə deyil, orta hesabla 1,2 milyon il əvvəl baş verməsi ehtimal olunur.
Alim həmçinin bəzi naməlum anomal hadisələrin (UAP) – əvvəllər UFO adlandırılan obyekt və hadisələrin – yerüstü olmayan mənşəyə malik ola biləcəyini ehtimal edir.
Knut bununla bağlı hərbi obyektlərin və nüvə infrastrukturlarının yaxınlığında UAP müşahidələri barədə ayrı-ayrı məlumatları nümunə göstərir.
Bununla belə, alim vurğulayır ki, bu cür obyektlərin mənşəyi hələ də məlum deyil və onların təbiətini müəyyənləşdirmək üçün əlavə araşdırmalara ehtiyac var.
Kevin Knut UAPx layihəsində və ABŞ-ın naməlum anomal hadisələrin öyrənilməsi üzrə Elmi Məsləhət Şurasının fəaliyyətində iştirak edir. O, bu hadisələrin elmi metodlarla araşdırılmasının tərəfdarıdır.
