Rusiya Prezidenti Vladimir Putin ölkənin hərbi elitasına nəzarəti gücləndirmək üçün Federal Təhlükəsizlik Xidmətinin (FTX) sərt xətt tərəfdarı əməkdaşlarına arxalanır.
Bu barədə Bloomberg məlumat yayıb.
Nəşrin yazdığına görə, Rusiyanın siyasi və biznes elitasının bir hissəsi Federal Təhlükəsizlik Xidmətinin getdikcə daha sərt fəaliyyət göstərməsindən və qurumun nəzarətdən çıxması ehtimalından narahatdır.
Putin Ukraynadakı müharibə fonunda hakimiyyətini qorumaq və ölkə daxilində artan narahatlığı nəzarətdə saxlamaq üçün FTX-ə daha böyük rol verir.
FTX-in təzyiqi artır
Bloomberg-in Kremlə yaxın mənbələrə istinadən yazdığına görə, milyarder və Telegram-ın həmtəsisçisi Pavel Durovun terrorizmdə ittiham olunması FTX-in təzyiq kampaniyasının gücləndiyinə dair son nümunələrdən biridir.
Mənbələr hesab edirlər ki, bu cür addımlar Rusiya hakimiyyətinin ölkənin siyasi və hərbi elitası üzərində nəzarəti daha da sərtləşdirmək niyyətindən xəbər verir.
Nəşr qeyd edir ki, Ukraynada müharibənin uzanması Rusiyanın hakim dairələrində narahatlığı artırır. Bu vəziyyətdə Kreml təhlükəsizlik strukturlarından daxili sabitliyi və hakimiyyət üzərində nəzarəti qorumaq üçün daha fəal istifadə etməyə çalışır.
