Komission mağazalarda və ikinci əl dükanlarında alış-veriş etmək artıq sadəcə qənaət üsulu deyil. Bu gün belə yerlər əslində gizli xəzinə axtarışına çevrilib. Qiymət etiketində cüzi məbləğ göstərilən əşyanın arxasında nadir antikvar və ya bahalı brend məhsul gizlənə bilər.
Peşəkar hərracçı Bene Rayu və interyer dizayneri Keyt Pirs ikinci əl bazarında alış qiymətindən qat-qat baha satıla bilən 8 əşya kateqoriyasını müəyyənləşdiriblər.
Azpost.info bildirir ki, bu barədə “Martha Stewart” yazır.
1. Gümüş fotoçərçivələr
Kiçik ölçülü gümüş fotoçərçivə tapmaq böyük uğur hesab olunur. Ən qiymətli nümunələr ovuc ölçüsündə olan və mürəkkəb naxışlarla bəzədilən modellərdir.
Mütəxəssislərin fikrincə, belə əşyalar hətta çox kiçik ölçüdə olduqda belə qiymətli ola bilər. Bunun səbəbi həm istifadə olunan qiymətli metalın çəkisi, həm də ustanın incə əl işidir.
2. Vintaj zinət əşyaları
İkinci əl mağazalarında bijuteriya və zinət əşyaları axtararkən detallara diqqət yetirmək vacibdir.
Gümüş məmulatların üzərində “sterling” yazısı və ya 925 əyar damğası olmasına diqqət etmək lazımdır.
3. Latun və gümüş salfet halqaları
Metal salfet halqaları klassik süfrə aksesuarlarından hesab olunur. Xüsusilə 4, 6 və ya 8 ədədlik dəstlər kolleksiyaçılar üçün daha qiymətli ola bilər.
Bu əşyalar həm vintage sevənlər üçün maraqlı kolleksiya, həm də fərqli hədiyyə variantıdır.
4. Kolleksiya üçün şüşə qablar
Komission mağazaların rəflərində çoxlu sayda şüşə qab görmək mümkündür. Lakin onların arasında ötən əsrin ortalarına aid nadir nümunələr də ola bilər.
Xüsusilə Culver markasının qızılı detallı məhsulları və nadir tematik seriyalar diqqət çəkir.
Burada əsas şərt əşyanın ideal vəziyyətdə qorunmasıdır.
5. Antik bar aksesuarları
Köhnə bar aksesuarlarının keyfiyyəti və dizaynını müasir kütləvi istehsal məhsullarında tapmaq həmişə mümkün deyil.
Kolleksiyaçılar xüsusilə 1980-ci illərin Memphis Group dizayn üslubunda hazırlanmış əşyalara maraq göstərirlər. Bu üslub parlaq rənglər və cəsarətli həndəsi formaları ilə seçilir.
6. Brend mətbəx əşyaları və çaydanlar
Keyfiyyətli metal mətbəx əşyaları onilliklər ərzində öz dəyərini saxlaya bilər.
Orijinal məhsulların alt hissəsində adətən aydın brend nişanı olur. Mütəxəssislər ağır bütöv misdən və ya yüksək keyfiyyətli poladdan hazırlanmış nümunələrə diqqət yetirməyi məsləhət görürlər.
İkinci əl mağazalarında Ruffoni, Mackenzie-Childs və Alessi kimi premium markaların məhsullarına rast gəlmək mümkündür.
7. Ağır latun şamdanlar
Latun məmulatlar uzun illər öz dəyərini qoruyan əşyalardan sayılır. Keyfiyyətli şamdan seçərkən ilk növbədə onun çəkisinə diqqət etmək tövsiyə olunur.
Bütöv latundan hazırlanan şamdanlar adətən ağır olur və maqnitə yapışmır.
Usta damğası və əl işi tökmənin izlərinin olması isə əşyanın kolleksiya dəyərini artıra bilər.
8. Metal və gümüş mücrülər
Zinət əşyalarının saxlanması üçün hazırlanmış gümüş və digər metallardan olan kiçik mücrülərə ikinci əl bazarında tez-tez rast gəlmək mümkündür.
Qiymətli metalların bahalaşması fonunda hətta çox kiçik ölçülü mücrülər belə maraqlı və dəyərli tapıntıya çevrilə bilər.
Maraqlı məqam
Ekspertlərin fikrincə, ikinci əl mağazasında alış-veriş edərkən əşyanın yalnız görünüşünə deyil, materialına, damğasına, istehsalçısına, yaşına və vəziyyətinə diqqət yetirmək lazımdır.
Bəzən rəfdə adi görünən köhnə bir çərçivə, şamdan və ya çaydanın real dəyəri üzərində yazılan qiymətdən dəfələrlə yüksək ola bilər.
Nadir
