“30 il ərzində Azərbaycan Avropa İttifaqının mühüm və etibarlı enerji tərəfdaşına çevrilib. Biz qürur duyuruq ki, Azərbaycanın ən böyük ticarət tərəfdaşıyıq”.
Bunu Avropa İttifaqının (Aİ) Azərbaycandakı nümayəndəliyinin rəhbəri Mariyana Kuyundziç Bakıda “Avropa-Azərbaycan münasibətləri: tarixi təcrübənin dəyərləndirilməsi və gələcək əməkdaşlıq istiqamətləri” mövzusunda dəyirmi masadakı çıxışında deyib.
Onun sözlərinə görə, Azərbaycan-Aİ münasibətləri dinamikdir: “Bu, çox diplomatik ifadədir, lakin münasibətlərimizdə dinamizm getdikcə daha da artır, münasibətlərimizi dərinləşdiririk. Mən ötən il sentyabrın 2-də Azərbaycana gəlmişəm. Həmin vaxtdan etibarən üç Aİ komissarı ilə görüşmüşəm. Bu, nazir səviyyəsinə bərabər bir vəzifədir. Həmçinin Avropa İttifaqı Şurasının prezidenti Antonio Koşta, eləcə də Aİ-nin xarici işlər və təhlükəsizlik siyasəti üzrə ali nümayəndəsi Kaya Kallas Azərbaycanda səfərdə olub”, – səfir qeyd edib.
O, iyulda Avropa Komissiyasının Prezidenti Ursula fon der Lyayen Azərbaycana səfər etdiyini, bunun ikitərəfli münasibətlərin daha dinamik xarakter aldığını göstərdiyini vurğulayıb: “Bu, həm də səfərlərdə görünməmiş bir saydır. Adətən səfirlər öz mandatları ərzində prezidentlə bir və ya iki dəfə görüşə bilirlər. Lakin ilk 10 ay ərzində onların hamısını Azərbaycanda qəbul etmişik. Bu, çox vacibdir. 2028-ci ildə Avropa Siyasi Birliyinin sammiti çərçivəsində onların yenidən Azərbaycana gələcəyini gözləyirəm”.
Aİ-nin Azərbaycandakı nümayəndəliyinin rəhbəri qeyd edib ki, Ursula fon der Lyayenin səfəri zamanı Azərbaycan Prezidenti İlham Əliyevlə ikitərəfli əməkdaşlığın genişləndirilməsi, regional sülh və bağlantı məsələləri müzakirə olunub.
O bildirib ki, fon der Lyayen Azərbaycanı Aİ-nin strateji tərəfdaşı adlandırıb və ölkənin etibarlı enerji tərəfdaşı kimi mühüm rolunu qeyd edib.
Mariyana Kuyundziçin sözlərinə görə, həmin səfər zamanı regional sülh təşəbbüslərini dəstəkləmək məqsədilə 20 milyon avroluq paket elan edilib. Bu vəsait səhiyyə, minatəmizləmə, yerli icmaların inkişafı, su idarəçiliyi, eləcə də kiçik və orta sahibkarlığın dəstəklənməsinə yönəldiləcək.
