2025-ci ildə dünyada dollar milyarderlərinin sayı 8,2% artaraq rekord həddə – 3 795 nəfərə çatıb. Bu barədə özəl kapital sahəsində araşdırmalar aparan analitik şirkət Altratanın məlumatında bildirilir.
Milyarderlərin sayındakı artım tempi son 5 ilin ən yüksək göstəricisi olub. Altrata bunu dünya üzrə sərvətlərin artımını sürətləndirən süni intellekt (AI) bumu ilə əlaqələndirir.
Şirkətin hesabatına görə, dünya milyarderlərinin ümumi sərvəti 12,8% artaraq rekord həddə – 15,1 trilyon dollara yüksəlib.
Hesabata əsasən, dünyada sərvəti 50 milyard dollardan çox olan 29 supervarlı şəxs var. Onların ümumi sərvəti təxminən 4,1 trilyon dollar təşkil edir. Bu, bütün milyarderlərin ümumi sərvətinin 27%-nə bərabərdir.
Müqayisə üçün, 2017-ci ildə sərvəti 50 milyard dollardan çox olan cəmi 10 nəfər vardı və onların payına dünya milyarderlərinin ümumi sərvətinin yalnız 7,2%-i düşürdü.
Altrata-nın araşdırma və analitika departamentinin rəhbəri Maya İmberq bildirib ki, süni intellekt sahəsindəki bum milyarderlərin sərvətləri arasındakı fərqin daha da artmasına səbəb olub. Onun sözlərinə görə, texnologiya şirkətlərinin səhmlərinin bahalaşması rekord sərvətlərin yaranmasına gətirib çıxarsa da, AI şirkətlərinin səhmləri ilə bağlı sərvətlərin dinamikası kifayət qədər dəyişkən ola bilər.
Altrata-nın məlumatına görə, 2025-ci ildə Şimali Amerikada milyarderlərin sayı 11,6% artaraq 1 337 nəfərə çatıb. Bu, bütün regionlar arasında ən yüksək artım tempidir.
Avropada milyarderlərin sayı 7,9% artaraq 1 081 nəfərə, Asiyada isə 6,5% artaraq 881 nəfərə yüksəlib.
