ABŞ, Böyük Britaniya, Fransa və Almaniya İranın nüvə öhdəliklərini pozması məsələsinin BMT Təhlükəsizlik Şurasına çıxarılmasına yol aça biləcək qətnamə layihəsi hazırlayıb.
Bu barədə diplomatlar Associated Press agentliyinə məlumat veriblər.
Sənədin Atom Enerjisi üzrə Beynəlxalq Agentliyin (MAQATE) Direktorlar Şurasının iclasında müzakirəyə çıxarılması mümkündür. Lakin layihə hələ rəsmi şəkildə təqdim edilməyib. Məzmunu ilə bağlı danışıqlar davam etdiyindən mətn dəyişə bilər.
Söhbət İranın Nüvə Silahlarının Yayılmaması haqqında Müqavilə çərçivəsində üzərinə götürdüyü öhdəlikləri yerinə yetirməsindən gedir. Bu öhdəliklərə əsasən, Tehran bütün nüvə materiallarını və fəaliyyətlərini bəyan etməli, onların hərbi məqsədlərlə istifadə olunmadığını yoxlamaq üçün MAQATE müfəttişlərinə imkan yaratmalıdır.
Qətnamə layihəsində MAQATE-nin baş direktoru Rafael Qrossiyə bu sənədi, eləcə də əvvəllər qəbul edilmiş qətnamələri agentliyin bütün üzv dövlətlərinə, BMT Təhlükəsizlik Şurasına və Baş Assambleyasına MAQATE Nizamnaməsinin müvafiq müddəalarına uyğun olaraq göndərmək təklif olunur.
Diplomatların sözlərinə görə, sənəd hələ razılaşdırılma mərhələsindədir və MAQATE Direktorlar Şurasının müzakirəsinə rəsmi şəkildə təqdim edilməyib. Layihənin müddəaları şuranın digər üzvlərinin təklifləri nəzərə alınmaqla düzəldilə bilər.
