ABŞ və Avropalı rəsmilər Ukraynada müharibənin ən azı gələn ilə qədər davam edəcəyini düşünürlər. Buna səbəb Rusiya ilə sülh danışıqlarının yenidən başladılması cəhdlərinin nəticə verməməsidir.
Azpost.info bildirir ki, bu barədə “Bloomberg” vəziyyətlə tanış olan mənbələrə istinadən məlumat yayıb.
Agentliyin mənbələrinin sözlərinə görə, ABŞ prezidentinin xüsusi nümayəndələri Cared Kuşner və Stiv Uitkoffun Moskvaya, daha sonra isə Kiyevə səfəri danışıqlarda ciddi irəliləyişə gətirib çıxarmayıb.
Avropalı rəsmilər bildiriblər ki, Vladimir Putin Kremlin üç saat davam edən görüşündə ABŞ nümayəndələri ilə danışıqlardan sonra mövqeyini yumşaltmağa hazır olduğunu göstərməyib.
Putin qışda zərbələri gücləndirə bilər
Bloomberg-in mənbələrindən biri bildirib ki, qarşıdakı 6 ay ərzində Rusiya Ukraynanın enerji sistemi və istilik təchizatına zərbələri artırmağı planlaşdırır.
Mənbənin iddiasına görə, məqsəd dinc əhali üçün həyat şəraitini ağırlaşdırmaqla yanaşı, Avropada hibrid hücumları gücləndirmək və Kiyevə dəstəyi zəiflətməkdir.
Digər mənbənin sözlərinə görə, Putin gələn ilin yazına qədər Rusiyanın daha güclü mövqeyə çıxacağına ümid edir. Bununla yanaşı, Rusiya iqtisadiyyatının üzləşdiyi artan çətinliklərə baxmayaraq, iqtisadi vəziyyəti sabit saxlamağa çalışır.
Mənbə hesab edir ki, həmin vaxta qədər ciddi danışıqların aparılması ehtimalı azdır.
Üçtərəfli görüş keçirilə bilər
Bloomberg-in digər mənbəsi bildirib ki, Putin Uitkoff və Kuşnerin səfərindən daxili auditoriyaya öz gücünü nümayiş etdirmək üçün də istifadə edib.
ABŞ-ın iştirakı ilə Rusiya və Ukrayna arasında üçtərəfli danışıqların keçirilməsi daha əvvəl Uitkoff və Kreml tərəfindən açıqlanmışdı.
Mənbələrin məlumatına görə, belə görüş Rusiyada sentyabr seçkilərindən sonra keçirilə bilər. Lakin onların fikrincə, bu danışıqların sülh sazişinə yaxınlaşma ilə nəticələnəcəyi ehtimalı aşağıdır.
Avropa Ukraynaya əlavə hava hücumundan müdafiə sistemləri göndərəcək
Mövcud vəziyyətdə Avropa ölkələri Ukraynaya əlavə hava hücumundan müdafiə vasitələri göndərmək üçün resurslar axtarmalı olacaq.
Böyük Britaniya çərşənbə axşamı Kiyevə 100 milyon funt sterlinq həcmində əlavə yardım paketi ayırdığını açıqlayıb.
Almaniyanın müdafiə naziri Boris Pistorius isə ölkəsinin öz ehtiyatlarından Ukraynaya təcili şəkildə “Patriot” raketləri göndərəcəyini bildirib.
“Ukraynanın qışa hazırlanması bizim üçün ən yüksək prioritetdir və bizdən qətiyyətli və təcili tədbirlər görməyi tələb edir”, – deyə Pistorius bildirib.
Nadir
