ABŞ-Azərbaycan münasibətlərində hazırda bir sıra yeni proseslər baş verir. ABŞ şirkətlərinin sentyabr ayında Azərbaycanda keçiriləcək Müdafiə Sərgisində iştirakı da bu əməkdaşlığın istiqamətlərindən biri olacaq.
Azpost.info-nun məlumatına görə, bunu ABŞ-ın Azərbaycandakı müvəqqəti işlər vəkili Emi Karlon diplomatik korpusun Qarabağa səfəri zamanı APA-ya açıqlamasında bildirib.
Diplomat qeyd edib ki, sentyabr ayında ABŞ şirkətləri Azərbaycan Müdafiə Sərgisində iştirak edəcək. Bununla yanaşı, digər ABŞ nümayəndə heyətlərinin də Azərbaycana səfərləri gözlənilir.
“Buna görə də strateji tərəfdaşlıq çərçivəsində əməkdaşlığımızı davam etdirməkdən çox məmnunuq”, – Emi Karlon bildirib.
ABŞ-ın Azərbaycandakı müvəqqəti işlər vəkili iki ölkə arasında strateji tərəfdaşlıq çərçivəsində əməkdaşlığın davam etdirilməsinin vacibliyini vurğulayıb.
Diplomat həmçinin ABŞ-ın Azərbaycana qarşı tətbiq etdiyi 907-ci düzəliş məsələsinə də toxunub. Onun sözlərinə görə, bu istiqamətdə tətbiq olunan məhdudiyyətlərin qüvvədən düşməsi növbəti il üçün təmin olunub.
Emi Karlon ABŞ-ın Azərbaycanla strateji tərəfdaşlıq çərçivəsində bu məsələdə birgə işləməyə sadiq olduğunu bildirib.
ABŞ şirkətlərinin Müdafiə Sərgisində iştirakı iki ölkə arasında xüsusilə müdafiə sənayesi və texnoloji əməkdaşlıq baxımından yeni imkanların yaranması kontekstində diqqət çəkir. Eyni zamanda, Azərbaycana yeni ABŞ nümayəndə heyətlərinin səfərlərinin planlaşdırılması Vaşinqton-Bakı əlaqələrində təmasların intensivləşdiyini göstərir.
